Fjalë Kyçe

Thaçi: E mirëpres vendimin e Kushtetueses, tash nuk duhet humbur kohë për formimin e Qeverisë së Re

Thaçi: E mirëpres vendimin e Kushtetueses, tash nuk duhet humbur kohë për formimin e Qeverisë së Re

Presidenti Hashim Thaçi, ka thënë se ka qenë i bindur se ka vepruar në përputhje me Kushtetutën në momentin që ka dekretuar Avdullah Hotin e LDK-së për kryeministër.

Ai ka reaguar përmes një postimi në Facebook, pak minuta pas Kushtetuesja e ka dhënë vendimin për dekretin e tij.

“E mirëpres vendimin e Gjykatës Kushtetuese lidhur me vlerësimin e kushtetutshmërisë së dekretit tim për mandatimin e z. Hoti, kandidat për kryeministër. Kam qenë i bindur se çdo hap që kam ndërmarr ishte në përputhje të plotë me Kushtetutën e Kosovës dhe më vjen mirë që këtë e konfirmoi edhe Gjykata Kushtetuese. Partitë politike dhe të gjitha institucionet duhet të tregojnë pjekuri politike, respekt dhe përkushtim për rendin, ligjin dhe institucionet e Republikës së Kosovës. Ato duhet t’i respektojnë, pranojnë dhe zbatojnë vendimet e autoritetit përfundimtar për interpretimin e Kushtetutës dhe përputhshmërisë së ligjeve e akteve të tjera me Kushtetutën”, ka shkruar Thaçi.

Ai ka thënë se Kosovën e presin shumë sfida dhe se për këtë nuk duhet humbur kohë në formimin e qeverisë së re.

“Kosovën e presin shumë sfida përpara, prandaj tash nuk duhet të humbet më kohë për formimin e Qeverisë së re, me legjitimitet të plotë nga Kuvendi i Kosovës”, ka shkruar Thaçi.