Thaçi: Kurti po frikëson dhe shantazhon opinionin publik, mediat e opinionistët, por unë nuk frikësohem

Presidenti i Republikës, Hashim Thaçi ka akuzuar kryeministrin në detyrë për frikësim dhe shantazhim të opinionit publik, mediave dhe ambasadave të huaja.
Thaçi në “Debat Plus” me Ermal Pandurin në RTV Dukagjini ka bërë krahasimin e situatës së tanishme me atë të vitit 2014 kur VLAN kishte tentuar të formojë qeverinë.

“Pas vendimit të Gjykatës Kushtetuese ka qenë çështje e mosmarrëveshjeve të atyre partive [VLAN] për të vazhduar me procedurën e formimit të qeverisë”.

Thaçi thotë se është vërtetur se Kurti dy herë ka shkelur kushtetutën.

“Ai ka uzurpuar edhe zyrën e kryeministrit dhe po sillet në mënyrë të jashtëligjshme. Ajo që është shumë shqetësuese është se dy president janë dorëhequr për shkak të shkeljes së kushtetutës. Tash shqetësuese është se ai është mbyllur në zyre dhe askush nga opinioni publik nuk reagon. Askush nga shoqëria civile, mediat, opinionistët që thirren si të pavarur apo nga faktori ndërkombëtarë nuk po reagon. Shtrohet pyetja pse nuk po reagojnë? Sepse janë të frikësuar, shantazhuar, kërcënuar nga Kurti dhe grupi i tij”.

“Por unë si president i vendit nuk frikësohem e as shantazhohem por mbrojë Kushtetutën, ligjshmërinë, shtetin dhe demokracinë. Nuk do të lejoj në asnjë rrethanë që gjërat e tilla të kalojnë aq lehtë”.

Thaçi shton më tej se thotë kjo heshtje mund të ndodh për shkak të frikës ose interesit.

“Tash kemi dy shkelje të rënda të kushtetuetës dhe kjo heshtje e plotë është frikësuese”, tha ndër të tjera Hashim Thaçi.