Trumpi betohet sot si president i SHBA-së

Donald Trumpi do të betohet sot (e hënë) si president i Shteteve të Bashkuara të Amerikës me premtimet për të shtyrë kufijtë e pushtetit ekzekutiv, për dëbim të miliona emigrantëve, si dhe për transformim të rolit të SHBA-së në skenën botërore.

Ceremonia e inaugurimit të Trumpit do të zhvillohet në mesditë (rreth orës 18:00 me kohë lokale të Kosovës) brenda Kapitolit të SHBA-së, katër vjet pasi një turmë mbështetësish të Trumpit shkelën simbolin e demokracisë amerikane në një përpjekje të pasuksesshme për të parandaluar humbjen e republikanit në vitin 2020 ndaj demokratit Joe Biden.

Betimi do të bëhet në ambiente të mbyllura për herë të parë pas 40 vitesh për shkak të të ftohtit ekstrem, raportoi Reuters.

Ish-presidentët që do të marrin pjesë në inaugurim janë Barack Obama, George W. Bush dhe Bill Clinton. Ish-zonja e parë, Laura Bush dhe ish-sekretarja e Shtetit Hillary Clinton do të marrin pjesë gjithashtu në këtë ngjarje.

Disa prej njerëzve më të pasur në botë si: shefi ekzekutiv i Teslas dhe SpaceX, Elon Musk, shefi ekzekutiv i Metas, Mark Zuckerberg dhe themeluesi i Amazonit, Jeff Bezos, do të marrin pjesë në ceremoninë e betimit dhe do të ulen në platformë së bashku me kabinetin e Trumpit.

Këngëtarja e muzikës kantri, Carrie Underwood do të performojë në ceremoninë zyrtare.

Në këtë ceremoni të betimit janë ftuar udhëheqës të huaj, përfshirë edhe disa figura nga Kosova.

Në mesin e tyre do të jetë kryetari i Aleancës për Ardhmërinë e Kosovës, Ramush Haradinaj, ish-presidenti Behgjet Pacolli e kryetari i Prishtinës, Përparim Rama.

Gjatë fushatës së tij, Trumpi ka pretenduar se do t’i japë fund luftës së Rusisë në Ukrainë brenda një dite, megjithatë këshilltarët e tij kanë pranuar se çdo marrëveshje paqeje do të marrë së paku muaj.