Usman fiton me nokaut kundër Masvidalit

Kamaru Usman ka shënuar fitore impresive me nokaut në raund të dytë ndaj Jorge Masvidalit, duke e mbrojtur kështu titullin e kampionit në kategorinë velter në UFC.

Usman triumfoi në mbrëmjen e UFC-së që u mbajt në Jacksonville ku ishin të pranishëm afro 15 mijë shikues.

Usmani 33-vjeçar ka vazhduar serinë e fitoreve në 18 meçe rresht. Masvidal 36-vjeçar, ndonëse kishte thënë se kurrë nuk është ndjerë më mirë pas një kampi përgatitor, pësoi keq. Usman e rrëzoi me një të djathtë të fuqishme. Usmani ka bilanc 19 fitore e një humbje, përfshirë 18 fitore rresht, prej tyre 14 në UFC.

“U kam thënë se ende po përmirësohem. Qielli është kufiri për mua, përderisa vazhdoj kështu. Unë e di se jam luftëtari më i mirë në planet”, ka thënë Usman, raporton BBC.

Masvidal pësoi humbjen e parë me nokaut në karrierën në 50 meçe në karrierën në MMA.

“Është hera e parë në karrierën time, dhe atë para njerëzve të mi, familjes sime e shoqërisë, dhe dhemb. Kurrë nuk jam nokautuar më parë. Usman më ka treguar diçka që nuk kishte treguar në meçin e parë. Nuk ndjeva fuqinë e tij në meçin e parë dhe ja se çfarë ndodh kur je shumë optimist. Më zuri në befasi. Nuk kam çfarë të them. Fitoi fer. Zoti e bekoftë”, ka thënë Masvidal.

Një fitore tjetër spektakolare me nokaut në mbrëmjen e UFC-së në Florida e shënoi edhe Rose Namajunas.

Namajunas e fitoi titullin e UFC-së me nokaut në raund të parë ndaj kampiones kineze Zhang Weili. Namajunas e nokautoi me një goditje të fuqishme me këmbë.