Vijnë të dhënat e para nga terreni, e nxjerrin fitues kandidatin e VV-së

Nga të dhënat e votave të para të numruara, në Podujevë po udhëheq Shpejtim Bulliqi. Mbetet të shihet nëse do të kalojë në balotazh. Në numërimi i deritanishëm i votave në Podujevë, po prin kandidati i Lëvizjes Vetëvendosje, Shpejtim Bulliqi.

Express mëson se ai është në epërsi të votave, megjithatë akoma nuk dihet nëse VV do t’i fitojë sonte zgjedhjet, apo do të shkohet në balotazh. Nëse vazhdon ky rezultat, atëherë LDK për herë të parë në 20 vjet nuk fiton në komunën, që konsiderohet bastion i saj.

Disa prej zyrtarëve të lartë të LVV tashmë e kanë shpallur fitoren në Podujevë. Kandidati i LDK, Nexhmi Rudari, ka thënë se është akoma herët të flitet për rezultatet.

Ndërkaq, kryetarja e KQZ, Valdete Daka, ka thënë se brenda dy orësh do të dihet rezultati preliminar. Sipas të dhënave të KQZ, në Podujevë kanë dalë në zgjedhje 40.51 për qind e votuesve.

Podujeva shkoi në zgjedhjet e parakohshme pasi kryetari i saj, Agim Veliu, la detyrën për t’u bërë pjesë e qeverisë në muajin shkurt të këtij viti. Në garën për kryetar të Podujevës kanë qenë Shpejtim Bulliqi i LVV, Nexhmi Rudari i LDK dhe Naim Fetahu i PDK.

Kushdo që sot fiton zgjedhjet në Podujevë, do ta udhëheqë komunën vetëm për 8 muaj, deri në mbajtjen e zgjedhjet komunale në tërë Kosovën, pra në fund të vitit 2021.