Vijnë urimet e para për Qeverinë e re

Vetëm pak minuta pas njoftimit se Lëvizja Vetëvendosje dhe Lidhja Demokratike e Kosovës, kanë nënshkruar marrëveshjen për bashkëqeverisje, rrjeti social, facebook është mbushur me reagime të shumta.

Ndër të parët që reaguan ishte vetë kandidati për kryeministër, Albin Kurti, i cili edhe ka përshëndetur të gjithë mbështetësit e tij, duke thënë se ka kohë që janë marrë vesh, por që tani kanë edhe marrëveshje me LDK-në, raporton KTV.

“Në negociatat me LDK-në, njëri-tjetrit, i kemi ofruar kërkesa e i kemi kërkuar oferta, jemi qarë e kemi qeshur, përherë të kujdesshëm që ndërmjet nesh të ndodhet një tavolinë. Jemi vonë, gjithsesi. Nuk është tepër vonë, pa dyshim. Moti jemi marrë vesh, tash kemi edhe marrëveshje. Do të qeverisim bashkë. Ju faleminderit për mbështetjen dhe durimin. Urime të gjithëve!”, ka shkruar Kurti.

Derisa, deputetë të Lidhjes Demokratike të Kosovës kanë shkruar lidhur me arritjen e marrëveshjes, duke thënë se këto dy parti janë partnerë të barabartë qeverisës dhe se do të angazhohen në të mirë të Kosovës.

“Qeverisë së Kosovës, të drejtuar nga z.Albin Kurti i uroj suksese dhe arritje sa më të mëdha në të mirë të Kosovës në sfidat që e presin”, ka shkruar presidenti i Shqipërisë në facebook, Ilir Meta.

Ai tutje ka shtuar se një qeverisje e qëndrueshme është në interes, jo vetëm për Kosovën, por për të gjithë rajonin.

“Përshëndes ngrohtësisht arritjen e marrëveshjes për bashkëqeverisje të Lëvizjes Vetëvendosja (LVV) dhe Lidhjes Demokratike të Kosovës (LDK) si dy parti fituese të zgjedhjeve të përgjithshme të 6 tetorit 2019 në Kosovë. Një qeverisje e qëndrueshme është në interes, jo vetëm të Kosovës, por edhe të gjithë rajonit. Qeverisë së Kosovës të drejtuar nga z.Albin Kurti, i uroj suksese dhe arritje sa më të mëdha në të mirë të Kosovës në sfidat që e presin”, ka shkruar Meta.

E kryeministri në detyrë, Ramush Haradinaj nga Deçani, ka paralajmëruar se AAK-ja nuk do ta votojë Qeverinë Kurti, në seancën e së hënës.