Volkswagen ndalon prodhimin e makinave në Rusi dhe pezullon dërgesat

Volkswagen ka ndaluar prodhimin e automjeteve në Rusi dhe poashtu do të pezullojë eksportet në tregun rus.

Prodhuesi i makinave tha se lajmi për luftën në Ukrainë është pranuar me shqetësim dhe tronditje të madhe nga kompania, shkruan CNN, përcjell Gazeta Express.

“Grupi Volkswagen e ka pranuar lajmin për luftën në Ukrainë me shqetësim dhe tronditje të madhe. Volkswagen vazhdon të shpresojë për një ndërprerje të armiqësive dhe një kthim në diplomaci. Ne jemi të bindur se një zgjidhje e qëndrueshme për konfliktin mund të gjendet vetëm në bazë të ligjit ndërkombëtar”, tha prodhuesi i makinave.

E ndalimi i prodhimit të këtyre makinave në Rusi, sipas kompanisë do të vlejë deri në një njoftim të ardhshëm.

“Në sfondin e sulmit rus në Ukrainë dhe pasojave që rezultuan, Bordi i Menaxhimit të Grupit të Volkswagen AG ka vendosur të ndalojë prodhimin e automjeteve në Rusi deri në një njoftim të dytë. Ky vendim vlen për vendet e prodhimit rus në Kaluga dhe Nizhny Novgorod”, shtoi ai, duke theksuar se eksportet e automjeteve në Rusi do të ndalen “me efekt të menjëhershëm”.

Prodhuesit e tjerë të makinave, duke përfshirë Ford dhe Renault, kanë ndalur gjithashtu prodhimin në Rusi. Jaguar Land Rover dhe Volvo thanë se do të ndalojnë dërgesat në Rusi deri në njoftimin e radhës.