Sami Lushtaku mund të sillet me forcë në gjykatë

Nesër pritet që të vazhdojë gjykimi ndaj Sami Lushtakut dhe gjashtë personave të tjerë të akuzuar lidhur me tenderin gjashtë milionësh për sigurimin e objekteve të KEK-ut.

Gjatë kësaj seance gjyqësore pritet që të akuzuarit të japin mbrojtjen.

Seanca e kaluar dështoi të mbahej pasi që në gjykatë pa ndonjë arsye nuk ishte i pranishëm Sami Lushtaku.

Pasi u konstatua mungesa e tij, kryetari i trupit gjykues, Beqir Kalludra, urdhëroi sjelljen e Lushtakut me detyrim.

Të akuzuar për këtë tender janë ish-drejtori i KEK-ut Arben Gjukaj, ish-kreu i Organit Shqyrtues të Prokurimit Hysni Hoxha, ish- kryetari i Skenderajt Sami Lushtaku, Esat Tahiri, Milazim Lushtaku, Driton Pruthi e Azem Duraku.

Sipas aktakuzës së Prokurorisë Esat Tahiri dhe Milazim Lushtaku akuzohen për mashtrim, ish-drejtori i prokurimit Driton Pruthi, ish-drejtorn e KEK-ut Arben Gjukaj dhe ish-kreu i OSHP-së Hysni Hoxha akuzohen për keqpërdorim të pozitës ose autorizimit zyrtar, Azem Duraku akuzohet për nxitje në keqpërdorim. /kallxo

Ndërsa ish- kryetarin e Skenderajt, Sami Lushtakun prokuroria e akuzon për shtytje në keqpërdorim të detyrës zyrtare.

Çështja e këtij tenderi të KEK-ut kishte shkuar më herët deri në Gjykatën Kushtetuese, e cila refuzoi kërkesën e të akuzuarve për t’i vënë masë të përkohshme procesit.