Pakësohen bankomatet, nuk ka kush t’i mbrojë të drejtat e klientëve të bankave

Numri i klientëve të sistemit bankar po rritet çdo vit, derisa po ulet numri i bankomatëve. Nga 512 bankomatët sa ishin në fillim të 2018-s në gjithë vendin, numri i tyre në fund të vitit ka rënë në 470. Derisa mbi 60 për qind e transaksioneve që bëjnë qytetarët janë për tërheqjen e parave nga llogaria.

Sipas kryetarit të Shoqatës së Bankave të Kosovës, Petrit Baliu, kjo po bëhet me qëllim të shmangies së tërheqjes së parasë nga bankomati dhe kryerjen e pagesave në pikat shitëse. Për ta kryer pagesën përmes kartelës në pikat shitëse, pjesa më e madhe e bankave kanë tarifë.

Ndërsa, vetëm një bankë ka mundësi së fundi tërheqjen e parave në markete, por që e njëjta mund të bëhen vetëm nëse fillimisht vlen një produkt.

Njohësi i sistemit bankar, Naim Gashi, vlerëson se bankat në vend janë duke ecur me hapa më të shpejtë sesa sistemi i jetës.

Mirëpo, Banka Qendrore e Kosovës sipas legjislacionit në fuqi, nuk ka të drejtë të përcaktimit të numrit të bankomatëve në proporcion me numrin e konsumatorëve.

Drejtori i Departamentit për Mbikëqyrjen e Bankave, Mentor Geci, ka thënë se nuk kanë të drejtë ta pengojnë mbylljen, pasi tregu është i hapur.

Numri i llogarive në banka është mbi 1 milion, prej tyre rreth 300 mijë llogari rrjedhëse.