Hoti reagon ndaj Veselit: Le të jetë i sinqertë me qytetarët që të shoh përgjigjet e tyre

Shefi i grupit të deputetëve të LDK-së, Avdullah Hoti, ka kundërshtuar idenë e kreut të PDK-së, Kadri Veseli, i cili ka thënë se për marrëveshjen e Kosovës me Serbinë do të vendos populli i Kosovës përmes referendumit.

Hoti, përmes një postimi në Facebook, ka thënë se “marrëveshja me Serbinë do të përfshijë normalizimin e marrëdhënieve tona me këtë shtet, asgjë më shumë.

Postimi i plotë i Hotit:

“Marrëveshja me Serbinë do të përfshijë normalizimin e marrëdhënieve tona me këtë shtet, asgjë më shumë. Prandaj, duhet të arrihet në përputhje me Kushtetutën e Kosovës dhe ligjet përkatëse.

Një marrëveshje e tillë nuk ka nevojë të shkojë në referendum, siç po paralajmëron shefi i PAN-it, veç nëse ai po planifikon korrigjim të kufirit me këtë marrëveshje. Le të jetë i sinqertë me qytetarë dhe pastaj do ta sheh vetë përgjigjen e qytetarëve”, ka shkruar Hoti.

Reagimi i Hotit vjen pas deklaratës së kreut të Kuvendit të Kosovës dhe PDK-së, Kadri Veseli, i cili duke folur për marrëveshjen me Serbinë, në një intervistë për gazetën austriake “Der Standard” ka thënë se “do të ketë marrëveshje me Serbinë, por për këtë do të organizohet një referendum. Qytetarët do të vendosin për këtë marrëveshje”.