Mungon mësuesja, prindi u jep mësim nxënësve

Në shkollën “Hasan Prishtina” në mungesë të mësueses së klasës së parë, një prind mbanë orën mësimore.

Këta nxënës janë nisur për në klasë.

E atje nuk do të takojnë mësuesen e tyre, pasi që ajo mungon.

E në vend të saj është një prind.

Ajo po zëvendëson mësuesen e klasës së parë të shkollës “Hasan Prishtina” meqë ndodhet në pushim për shkak të një rasti të vdekjes në familje.

Këtë e ka konfirmuar edhe drejtoresha e shkollës, Sofie Bunjaku.

Ajo nuk ka pranuar të flasë para kamerës mirëpo, ka thënë që prindi ka ardhur vetëm për të mbajtur qetësinë e nxënësve në klasë.

Bunjaku po ashtu tregon se nga e hëna, mësuesja e klasës së parë do të kthehet në vendin e saj të punës.

Po ashtu, prapa kamerave prindërit e nxënësve thonë që një gjë e tillë nuk është e rrallë në shkollën Hasan Prishtina.

Mirëpo, për këtë askush nuk ka ndërmarrë asgjë.

E Drejtoria Komunale e Arsimit në Prishtinë thonë që nuk janë në dijeni për rastin.

Ata thonë që zëvendësimi për një periudhë të shkurtë bëhet brenda stafit të shkollës por jo nga prindërit e nxënësve.

Nga DKA, njoftojnë se së fundmi në shkollën “Hasan Prishtina” kanë angazhuar një mësimdhënës të klasave të para, pasi që ka pasur mungesë.