Presioni për zëvendësimin e orëve, SBASHK sjell vendimin e fundit

Sindikata e Bashkuar e Arsimit, Shkencës dhe Kulturës e Kosovës, pak para seancës së jashtëzakonshme të Kuvendit të Kosovës, u ka thënë deputetëve se është më mirë të diskutojnë për mungesën e kushteve elementare të punës në shumicën e shkollave të Kosovës se sa të merren me një vendim jo ligjor të ministrit të Arsimit, Shyqeri Bytyqi.

SBASHK nëpërmjet një komunikate ka thënë se ligji për grevat i Republikës së Kosovës  e njeh grevën si veprim demokratik dhe nuk obligon grevistët që orët apo ditë e humbura në grevë të kompensohen.

Komunikata e plotw:

“Ministri Bytyqi  nxori një vendim  të pabazuar në ligj dhe bashkë me një pjesë të drejtorëve të drejtorive arsimore e të disa shkollave filluan një presion të paparë ndaj mësimdhënësve për  kompensim të orëve të humbura në grevë.

SBASHK duke e konsideruar me të drejtë këtë vendim jo ligjor ngriti padi në Gjykatën Themelore në Prishtinë duke kërkuar që institucioni i drejtësisë të vlerësojë ligjshmërinë e këtij vendimi  dhe SBASHK-u publikisht është deklaruar se do ta respektojë verdiktin e gjykatës.

Mendojmë se çdo diskutim më parlament  në dobi të vendimit joligjor të ministrit Bytyqi do të ishte ndërhyrje dhe presion në institucionin e drejtësisë. Deputetë të nderuar ju sot është më mirë të diskutoni  për mungesën e kabineteve të informatikës, kimisë, fizikës e lendeve të tjera, për mungesën e sallave të edukatës fizike, për gjendjen  e mjerë të nyjave sanitare, pra për mungesën e kushteve elementare të punës në shumicën e shkollave të Kosovës, mungesa këto që ndikojnë shumë në procesin mësimor e edukativ se sa të merreni me një vendim jo ligjor  të ministrit Bytyqi.

Sot duhet t’i qortoni ministrin dhe një pjesë të drejtorëve, të cilët duke bërë presione për zëvendësimin e orëve të humbura në grevë, por pengojnë procesin mësimor. Duhet t’i qortoni e të merrini masa ndaj drejtorëve, si rasti  në Mitrovicë, kur drejtori jep urdhër me shkrim, që duhet zëvendësuar orët edhe për ditët që mësimdhënësi ka qenë i sëmurë dhe në pushim mjekësore.

SBASHK ka njoftuar se nëse vazhdohet me presione ndaj mësimdhënësve për të zëvendësuar orët e humbura gjatë grevës, SBASHK-u duke dëgjuar zërin dhe kërkesën e punëtorëve të arsimit të Kosovës do të shpall grevë si reagim ndaj këtyre presioneve.