“Mësimi i rregullt në Shkollën e Mesme Teknike “ Rudina” në QK Dubravë, paralele e ndarë e Shkollës së Mesme Teknike,” Mithat Frashri” në Gurrakoc, do të filloj me date: 02.09.2019, dhe personi në fjalë do ta filloj shkollimin në Qendrën Korrektuese Dubravë”, ka thënë ai.

Në këtë institucion deklarojnë se Hajrizi nuk ka pasur ndonjë shkelje disiplinore gjatë muajve të fundit.

“Personi në fjalë është transferuar nga Burgu i Sigurisë së Lartë në QK Dubravë, pikërisht për vazhdimin e shkollimit. Ka ardhur pa ndonjë shkelje disiplinore në muajt e fundit dhe prej kohës që është transferuar në QK Dubravë vazhdon t`i ketë sjelljet e mira”, thuhet në përgjigjet e SHKK’së.

Ndryshe, shkollimi i të burgosurve është i rregulluar edhe me Ligj. Në bazë të nenit 83, të Ligjit për Ekzekutimin e Sanksioneve Penale, personi i dënuar ka të drejtë në shkollim fillor dhe të mesëm në pajtim me ligjin për arsimin fillor dhe të mesëm, ndërsa sipas Ligjit për Arsim, secili person gëzon të drejtën e shkollimit themelor.

Faton Hajrizi është i dënuar për vrasje. Ai kur i kishte vetëm 15 vjeç kishte vrarë një ushtar rus në Kosovë. Ia kishte marrë armën atij dhe e kishte qëlluar.

Vrasjen kishte thënë se e kishte kryer pasi që ishte ofenduar nga ushtari rus. Kishte shpjeguar se vrasja kishte ndodhur pasi të njëjtin e dëgjoi duke folur në gjuhën serbe, derisa kishte shkuar që ta falënderonte me idenë se ishte ushtar amerikan.

“Unë shkova duke menduar që është ushtar amerikan dhe thash të shkoj ta falënderoj për kontributin në Kosovë. Ai ia nisi me fol serbisht dhe u shtymë me llafe dhe ia mora armën dhe e vrava”, kishte thënë Hajrizi.

Për këtë dhe krime tjera, tash 36 vjeçari nga Skenderaj është i dënuar me 25 vite burgim. Ai është në vuajtje të dënimit për herë të dytë që nga 13 janari i 2007’ës, derisa lirimi përfundimtar i tij parashihet të bëhet më 22 shtator 2031.

Ndryshe, numri i personave që aktualisht gjenden prapa grilave në vuajtje të dënimit shkon në rreth 1 mijë e 600 të burgosur.

Secili prej tyre i kushton buxhetit të shtetit më të varfër në rajon rreth 28 euro në ditë, shifër kjo që deri në fund të vitit arrin në mbi 10 mijë euro.

Ndërsa, sipas një përllogaritjeje për të gjithë të burgosurit, vendi harxhon për një vit më shumë se 15 milionë euro. Ndërsa në tri vjetët e fundit janë shpenzuar afër 45 milionë euro nga kuleta e shtetit për këtë qëllim.