Haradinaj thotë se migrimi i kosovarëve drejt Evropës është zvogëluar

Kryeministri i Kosovës, Ramush Haradinaj sot ka takuar edhe Ambasadorin e Gjermanisë në Kosovë, Christian Heldt. Gjatë këtij takimi Haradinaj ka thënë se migrimi i kosovarëve në vitin 2018 krahasuar me vitin 2015 është zvogëluar.
Ai ndër të tjerashgjatë takimit me ambasadorin gjerman, ka theksuar se Kosova ka përmbushur të gjitha kriteret për liberalizimin e vizave, ka shënuar progres të konsiderueshëm në fushën e sigurisë, rendit dhe ligjit dhe është e përkushtuar që të avancojë me raportet bilaterale me Gjermaninë dhe, gjithmonë e gatshme për marrëdhënie të mira me të gjitha vendet fqinje.

“Kisha kënaqësi të ndaj me ambasadorin Heldt statistikat e fundit reale të migrimit, ku Kosova tregon qartë se nuk përbënë rrezik të migrimit, duke shënuar trendin më të vogël ndër vite me vetëm 723 raste të kërkesave për migrim në vitin 2018. Krahasuar me vitin 2015, ku shifrat e migrimit tregonin për 67.545 persona që kanë migruar, viti 2018 me vetëm 723 raste, tregon qartë një rënje prej 98%, rezultat ky që dëshmon përkushtimin e qytetarëve të Kosovës, për të respektuar së pari, shtetin e Kosovës dhe gjithashtu për të respektuar parimet bazë të lëvizjes së lire”. thuhet në komunikatën e Zyrës së Kryeministrisë.