LDK: Negociatat me LVV vetëm pas certifikimit të rezultateve

Pas mbledhjes së kryesisë së LDK-së, zëdhënësi i kësaj partie Besian Mustafa theksoi se në mbledhje është diskutuar për rezultatin e zgjedhjeve të mbajtura më 6 tetor.

Ndërsa shtoi se negociatat me Lëvizjen Vetëvendosje do të zhvillohen vetëm pas certifikimit të rezultateve, ngase sipas tij, është një rezultat i ngushtë mes LDK dhe VV.

Mustafa nuk është përgjigjur se sot në këtë mbledhje është formuar apo jo Grupi punues për negociata me VV-në për koalicion pas zgjedhor.

Ndryshe dje kandidatja për kryeministre e LDK-së, Vjosa Osmani dhe kreu i VV-së, Albin Kurti, pas takimit të parë që e patën pas përfundimit të zgjedhjeve të jashtëzakonshme kanë pohuar se  do të angazhojnë ekipe punuese për të biseduar për një koalicion të mundshëm .

Lëvizja Vetëvendosje dhe Lidhja Demokratikë e Kosovës janë pajtuar që të qeverisin bashkë.

Pas takimit me Kurtin, Vjosa Osmani ka folur para mediave, duke thënë se tashmë ju mbetet partive që të flasin për detajet.

“Ne sapo zhvilluam takimin për diskutuar bashkëpunimin pas një procesi të mirë. Kemi diskutuar në nivel parimeve. Të dy partitë treguan vullnetin e mirë për të qeverisur bashkë. Ka disa gjëra me të cilat filluam diskutimeve, sa i përket një qeverie që do të reduktohet sa i përket numrit të ministrive, por do të rritet sa i përket punës së mirë që do të bëhet. Iu mbetet partive që diskutohen për detajet”, ka thënë ajo.

Ende nuk është bërë e ditur nga partitë se në sa ora do të mbahet takimi i parë në mes të grupeve koordinuese.