Dyshohet për një rast me koronavirus në Kosovë, pacienti është nga Britania e Madhe

Një pacient i shtrirë në Qendrën Klinike Universitare të Kosovës po dyshohet se është i prekur nga koronavirusi. Pacienti i dyshuar me koronavirus thuhet se ndodhet në ambientet e Klinikës Infektive brenda QKUK’së.

Për këtë Instituti Kombëtar i Shëndetit Publik dhe drejtori Naser Ramadani ka zhvilluar një konferencë për shtyp ka ka qenë prezent edhe ministri i Shëndetësisë, Arben Vitija.

Aty është bërë me dije se po bëhen egzaminimet e duhura, por tani për tani bëhet fjalë vetëm për dyshimet e lindura nga familjarët. Ministri VItija ka thënë se pacienti është shtetas i Britanisë së Madhe dhe aktualisht është në gjendje të mirë shëndetësore.

Ndërsa Naser Ramadani ka thënë se rasti do të trajtohet sipas protokolleve ndërkombëtare të shëndetësisë, derisa Kosova është e pajisur me reagenca për trajtimin e sëmundjes.
Numri i viktimave në Kinë nga shpërthimi i koronavirusit është rritur në 723, njoftoi Komisioni Kombëtar Shëndetësor i vendit (NHC).

Autoritetet njoftuan se deri më tani janë konfirmuar 34 546 raste, ndërsa 86 persona kanë vdekur dhe më shumë se 3000 raste të reja janë zbuluar gjatë 24-orëve të fundit.

Numri i personave nën vëzhgim mjekësor është rritur në 185 555, ndërsa numri i atyre që dyshohet se janë të infektuar është 27 657.

Gjithashtu numri i personave të infektuar jashtë territorit kryesor të Kinës ka arritur në 26 në Hong Kong dhe 10 në Makau.

Thuhet se virusi është transmetuar te njerëzit nga kafshët, veçanërisht nga lakuriqët e natës.

Përveç se në Kinë, virusi është përhapur në më shumë se 20 vende, përfshirë SHBA-në, Britaninë e Madhe, Singaporin, Francën, Rusinë, Spanjën dhe Indinë.

Shumë vende kanë evakuuar qytetarët e tyre nga Wuhan-i, epiqendra e virusit dhe zona të tjera të prekura të Kinës.

Organizata Botërore e Shëndetësisë (OBSH) ka shpallur epideminë emergjencë ndërkombëtare.