Klubet e Premier Leagues presin të luajnë pa shikues shkaku i koronavirusit

Klubet e Premier Leagues presin që të luajnë ndeshje pa shikues për shkak të koronavirusit, shkruan “The Sun” të enjten, transmeton Koha.net.

Më herët gazeta angleze kishte njoftuar se si krerët e ligës i kanë dërguar letër të gjitha 20 klubeve duke i paralajmëruar për mundësinë që të luhen ndeshjet pa shikues, në mënyrë që stinori të mbarojë në kohë.

Shefi i financave te Evertoni, Sasha Ryazantsev ka thënë se Evertoni është duke u përgatitur që të luajë pa shikues.

“Gjithë situata shkon përtej botës së sportit. Sigurisht asnjëri nuk dëshiron të luajë pa shikues. Por, ne ndjejmë se mund të ndodh kjo në javët në vijim”, ka deklaruar Ryazantsev. “Nuk do të kishte të bënte kjo me para, por me kujdes ndaj tifozëve tanë. Besoj se ata do ta kuptonin. Do të ketë ndikim negativ në lub dhe futboll, por përkohësisht e jo ndikim afatgjatë”.

Qeveria e Italisë të mërkurën ka urdhëruar që gjitha aktivitetet sportive të organizohen pa shikues së paku deri më 3 prill.

Italia është vendi evropian që është prekur më së keqi nga koronavirusi.

Disa ndeshje në Serie A u shtynë në javët e fundit, ndërsa pesë ndeshje u luajtën pa shikues fundjavën e kaluar.

Zvicra ndërkohë ka pezulluar aktivitetet sportive po ashtu.