Trepça po mobilizohet për këtë garë evropiane

Organizimi i mirë dhe rezultatet pozitive gjatë dy viteve të fundit kanë bërë që klubi i Trepçës t’i rrisë ambiciet.

Me një sezon fantastik ku arriti tri finale dhe triumfoi në njërën prej tyre, Trepça e Mitrovicës për edicionin e ri të garave po synon të dalë edhe në garat evropiane.

AsistiOnline ka mësuar se ‘xehetarët’ janë duke u mobilizuar dhe duke kompletuar ekipin, jo vetëm për Kosovë dhe Ligën Unike, por synojnë që të luajnë edhe në një prej garave evropiane, konkretisht në FIBA Europe Cup.

Në lidhje me këto pretendime të Trepçës, drejtori sportiv i klubit, Izet Tahiri, ka treguar se lajmi është i vërtetë, për çka edhe janë duke u mobilizuar dhe duke punuar maksimalisht.

”Po është e vërtetë se ne sivjet po synojmë të luajmë në garat ndërkombëtare, përpos Ligës Unike, besoj që do të jemi edhe në FIBA Europe Cup, kompeticion shumë serioz evropian, jemi duke punuar në këtë drejtim dhe duke bërë përgatitjet e nevojshme, shpejt besojmë që do të konfirmohet gjithçka, nëse nuk del ndonjë problem i paparashikuar”, u shpreh Tahiri për AsistiOnline.

Trepça deri tani është skuadra më aktive në basketbollin e Kosovës, duke vazhduar bashkëpunimin me trajnerin Lyubomir Minchev, basketbollistët Drilon Hajrizi dhe Amin Hot, gjersa ka zyrtarizuar edhe tri transfere të frytshme, Erjon Kastratin, Mikaile Tmushiqin dhe Jahsim Floydin.

Të kujtojmë se në të kaluarën, Trepça ishte paraqitur për një edicion në Ligën Ballkanike gjatë stinorit 2016/17, ku e kishte mbyllur garën në fazën grupore me 4 fitore e 6 humbje.