Bajraktari: Studentët që dalin nga Universiteti i Ferizajt gjejnë më lehtë punë

Rektori i Universitetit të Shkencave të Aplikuara në Ferizaj (USHAF), Agron Bajraktari, deklaroi të hënën, se studentët që i përfundojnë studimet në këtë universitet, gjejnë më lehtë punë.

Ai tha në emisionin “SOT” të KTV-së, se aktualisht është i hapur afati për aplikim për pranim të studentëve, e interesimi sipas tij, është i madh.

“Nga data 12 deri më 19 korrik është afati i parë për pranimin e studentëve. Studentët aplikojnë online pastaj i sjellin dokumentet fizike. Ata mund të aplikojnë në 7 programe bachelor e në 3 master. Interesimi është i njëjtë, për të mos thënë më i lartë krahasuar me vitet e kaluara. Presim që vendet e lira të plotësohen”, tha Bajraktari.

Sipas tij, USHAF-ja i pranon gjithsej 400 studentë në bachelor e 100 në master.

“Kemi nevojë që opinionin ta informojmë mbi programet tona, si një universitet që synim ka aplikimin e dijes dhe shkencës. Më 1976 nisi USHAF-i si pjesë e Universitetit të Prishtinës, për t’u avancuar në universitet në vitin 2015. Nga 2016-a punon i pavarur nga UP-ja. Programet kanë lindur si nevojë për t’u avancuar edhe më tej”, tha rektori i këtij universiteti, duke shtuar se në mesin e programeve që ky institucion i ofron janë dizajni grafik, multimedia, programet për menaxhim të turizmit, inxhinieria e informatika.

Sipas Bajraktarit, USHAF-i është universitet i profilizuar e unik, ndërsa shtoi se studentët me të mbaruar shkollimin, gjejnë vende pune falë bashkëpunimit me ndërmarrësitë në qytetin e Ferizajt.

“Drejtimet e inxhinierisë janë më pak me interes, në hoteleri dhe turizëm, arkitekturë të gjelbër e dizajn grafik interesi është më i madh. Bashkëpunimi me ndërmarrje ka bërë që studentët tanë të gjejnë vende pune. Në nivelin master pothuajse të gjithë studentët punojnë. Ferizaj është qytet i zhvilluar meqë është në mes Shkupit e Prishtinës. Është fat i mirë, studentët gjejnë punë më lehtë. Çdo studenti i ofrohen disa mundësi për punë, pa u larguar nga vendi. Në vendin tonë ka qenë jashtëzakonisht e vështirë të gjenden vende pune, tash kjo është zbutur”, tha Bajraktari.

Interesim për USHAF-in, sipas rektorit ka nga Maqedonia e Veriut, Shqipëria, Presheva.

“Një numër i madh i programeve që ne i kemi nuk janë pjesë e universiteteve të tjera në Kosovë”.