Aktakuzë ndaj arkëtares së Spitalit të Prizrenit, i mori për vete afër 5 mijë euro nga pagesat e pacientëve

Prokuroria Themelore në Prizren, ka ngritur aktakuzë ndaj arkëtares së Spitalit të Prizrenit, nën dyshimet për veprën penale “përvetësimi në detyrë”.

Sipas komunikatës së Prokurorisë, F.G., nga Prizreni, derisa ishte në detyrën e zyrtares financiare dhe të arkëtares, në Spitalin e Përgjithshëm “Prim.Dr Daut Mustafa”, në Prizren, dyshohet se ka përvetësuar afër 5 mijë euro nga xhirollogaria e spitalit, shkruan gazeta online Reporteri.net.

Rasti ka ndodhur në periudhën kohore 28.06.2022 e deri me datë 12.08.2022.

“Sipas aktakuzës, e pandehura si person zyrtar me qëllim të përfitimit të kundërligjshëm të dobisë pasurore për vete, përvetëson pasurinë e cila i është besuar për shkak të detyrës apo pozitës së saj, në atë mënyrë që në cilësinë e Zyrtares financiare dhe të arkëtares, në Spitalin e Përgjithshëm “Prim.Dr Daut Mustafa”, në Prizren, prej periudhës kohore 28.06.2022 e deri me datë 12.08.2022 prej reparteve të Oftalmologjisë, Dializës dhe Emergjencës, në arkë ka inkasuar para në vlerë prej 36,143.38 euro euro ndërsa në xhirollogarinë e Spitalit ka deponuar vetëm 31,385.00 Euro dhe kësisoj ka përvetësuar shumën prej 4,758.38 euro dhe për shumën e njëjtë i ka shkaktuar dëm financiar Spitalit të Përgjithshëm “Prim. Dr. Daut Mustafa”, në Prizren”, thuhet në komunikatën e lëshuar.

Prokurori i çështjes me rastin e ngritjes së aktakuzës, i ka propozuar Gjykatës që pas mbajtjes së shqyrtimit gjyqësor, administrimit të provave dhe vlerësimit të tyre, e pandehura e lartëcekur për veprën penale për të cilën akuzohet të shpallet fajtore dhe të dënohet sipas ligjit