Ronaldo e konsideron vazhdimin e kontratës me Al Nassr

Cristiano Ronaldo raportohet se dëshiron ta vazhdojë qëndrimin në Al Nassr.

Lajmin e ka bërë të ditur “TalkSPORT”.

Edhe pse kontrata e tij me klubin nga Arabia Saudite është e vlefshme deri në verën e vitit 2025, 39 vjeçari ka thënë se është i hapur për t’ia shtuar asaj një vit tjetër në mënyrë që të luajë ende në Saudi Pro League.

Ronaldo ka shfaqur formë të jashtëzakonshme që kur i ishte bashkuar Al Nassr, ndërsa në këtë sezon i ka realizuar 33 gola në 28 ndeshje në këtë edicion.

Ndikimi i tij e ka rritur imazhin e klubit dhe liga është bërë më e fortë që prej arritjes së tij, e pasuar më pas nga yje të tjerë.

Vazhdimi eventual i kontratës do ta linte Ronaldon në Al Nassr deri në verën e vitit 2026.

Klubi saudit ndërkohë do ta festonte këtë vazhdim eventual të bashkëpunimit pasi do ta kishte në gjirin e tij edhe për një vit njërin prej lojtarëve më të mirë në histori të futbollit.

Fituesi i pesëfishtë i Topit të Arte dhe i pesëfishtë i Ligës së Kampionëve, rekordmen i disahershëm, e mbylli eksperiencën evropiane, ku kishte luajtur në Sporting Lisbonë, Manchester United, Real Madrid dhe Juventus, për t’i kaluar vitet e fundit të karrierës në Arabinë Saudite.