Kosova dhe Britania nënshkruajnë marrëveshje në fushën e mbrojtjes ushtarake

Ministri i Mbrojtjes, Ejup Maqedonci ka nënshkruar sot me Ministrin e Forcave të Armatosura të Mbretërisë së Bashkuar, Leo Docherty Memorandumin e Mirëkuptimit ndërmjet Ministrisë së Mbrojtjes së Republikës së Kosovës dhe Ministrisë së Mbrojtjes së Mbretërisë së Bashkuar të Britanisë së Madhe dhe Irlandës së Veriut.

Maqedonci në një njoftim në Facebook ka shkruar se kjo marrëveshje do të formësojë edhe më tej bashkëpunimin e shkëlqyeshëm bilateral në fushën e mbrojtjes mes dy vendeve.

“Bashkëpunimi përfshinë koordinimin për mbështetjen e integrimit të Republikës së Kosovës në NATO, realizimin e ushtrimeve dhe trajnime të përbashkëta, mbështetje dhe trajnime për operacione ndërkombëtare dhe misione ushtarake, si dhe shkëmbim përvojash në fusha të tjera”.

Ministria e Mbrojtjes së Republikës së Kosovës është shprehur mirënjohëse ndaj Mbretërisë së Bashkuar për mbështetjen e pakursyer dhe të vazhdueshme në zhvillimin e kapaciteteve mbrojtëse të vendit tonë.

Edhe Britania e Madhe ka përshëndetur këtë marrëveshje, duke deklaruar se Memorandumi do të ndikojë në rritjen e sigurisë rajonale.