Ministria e Jashtme e Maqedonisë së Veriut shpreh keqardhje për incidentin me Osmanin

Ministria e Jashtme e Maqedonisë së Veriut ka shprehur keqardhje për incidentin në të cilin është përfshirë presidentja e Kosovës, Vjosa Osmani, në Aeroportin e Shkupit të enjten në mbrëmje.

Në një komunikatë të lëshuar më 2 gusht (sot), Ministria e Jashtme ka theksuar se Maqedonia e Veriut dhe Kosova kanë marrëdhënie dhe bashkëpunim pozitiv e konstruktiv.

“Republika e Maqedonisë dhe Republika e Kosovës mbajnë marrëdhënie dhe bashkëpunim dypalësh pozitiv dhe konstruktiv, me çështje të hapura dhe me dialog të sinqertë dhe të vazhdueshëm në të gjitha nivelet dhe në të gjitha fushat. Në kontekstin e mëposhtëm shprehim keqardhjen për keqkuptimet e ndodhura gjatë ditës së djeshme, gjatë udhëtimit të Presidentit të Republikës së Kosovës Vjosa Osmani në Aeroportin Ndërkombëtar të Shkupit”, thuhet në komunikatë.

Ministria e Jashtme që udhëhiqet nga Timco Mucunski ka thënë se pasi t’i mbledhë të gjitha informacionet do të marrë masat e nevojshme që raste të tilla të mos përsëriten.

“Kujtojmë se Ministria e Punëve të Jashtme dhe Tregtisë së Jashtme e Republikës së Maqedonisë së Veriut tashmë ka kërkuar informacion nga të gjitha institucionet përkatëse në lidhje me ngjarjen e djeshme. Pasi të bëhet analiza e duhur e të dhënave të mbledhura në bashkëpunim të drejtpërdrejtë me Ministrinë e Brendshme, do të ndërmerren të gjitha veprimet dhe masat e nevojshme, me qëllim kryesor shmangien e dukurive dhe situatave të tilla apo të ngjashme në të ardhmen”, vijon komunikata.

Deri tash, autoritetet e Maqedonisë së Veriut kanë pasur reagime të rezervuara për incidentin, pavarësisht kërkesës së Kosovës për kërkimfalje.