Kufizimi i orarit të punës për shkak të temperaturave të larta, evidentohen disa raste të shkeljes së vendimit

Temperatura përvëluese kanë përfshirë vendin tonë tash e disa ditë, për këtë arsye, Ministria e Shëndetësisë nga data 14 deri më 17 gusht ka kufizuar orarin e punës, me qëllim të mbrojtjes së shëndetit të qytetarëve.

Kryeinspektori i Punës, Hekuran Nikçi në një prononcim për Telegrafin ka thënë se inspektorët janë duke bërë mbikëqyrjen e zbatimit të vendimit, derisa shtoi se për gjatë dy ditëve kanë evidentuar gjashtë raste nuk është respektuar vendimi.

“Ju njoftoj se vendimi i datës 13 gusht i Ministrisë së Shëndetësisë për reduktimin e orarit të punës po gjen zbatim për faktin se përgjatë dy ditëve të kaluara, 14 dhe 15 gusht, përgjatë kontrollave për mbikëqyrjen e zbatimit të vendimit në fjalë, Inspektorati Qendror i Punës, ka evidentuar gjithsejt vetëm 6 raste. Ku 3 raste janë evidentuar punëtorë duke punuar në kundërshtim me vendimin në sektorin e ndërtimtarisë, 2 raste të shtatzënave dhe 1 rast të sëmundjes kronike”, u shpreh ai.

Tutje, ai bëri thirrje tek të gjitha subjektet juridike që të bëjnë zbatimin e vendimit të Ministrisë së Shëndetësisë.

Ndryshe, MSH kishte njoftuar se vendimi për reduktim të orarit të punës është marrë duke pasur parasysh praktikat më të mira për mbrojtjen e shëndetit dhe sigurisë së punëtorëve gjatë periudhave me temperatura të larta.

Masat e vendosura nga MSH:

Nga data 14.08.2024, deri më 17.08.2024 kufizohet orari i punës;

1.1 Gjatë kësaj periudhe të nxehtësisë ekstreme, rekomandohet që të ndryshohen oraret e punës për të shmangur punën në orët më të nxehta të ditës, nga ora 11:00 deri në 16:00;

1.2 Të aplikohet orari fleksibël i punës, që nënkupton lejimin e punëtorëve që të fillojnë punën më herët në mëngjes ose të punojnë nga shtëpia nëse ka mundësi;

1.3 Shtatzënat të lirohen nga puna gjatë orëve të pikut të nxehtësisë 11:00 — 16:00, ose të punojnë nga shtëpia;

1.4 Në oraret 11:00 — 16:00 ndalohet puna për qytetarët e prekur me sëmundje kronike, apo të punojnë nga shtëpia;

1.5 Të ndalohen punimet në sektorin e ndërtimtarisë, që janë të ekspozuara në diell gjatë orarit 11:00-16:00;

1.6 Të shpërndahen informacione përmes burimeve të informimit dhe broshurave e materialeve të tjera informuese për qytetarët për mënyrat e mbrojtjes nga nxehtësia;

1.7 Të sigurohen kontrolle mjekësore për të punësuarit që tregojnë shenja të stresit nga nxehtësia dhe që i janë ekspozuar nxehtësisë ekstreme;

1.8 Ata që merren me punët në bujqësi, të planifikojnë zhvillimin e tyre në mëngjes herët ose pasdite vonë për të shmangur ekspozimin në nxehtësinë e madhe.

Temperatura të larta kanë mbizotëruar edhe gjatë muajit korrik.

Instituti Kombëtar i Shëndetit Publik ka bërë thirrje që qytetarët të kenë kujdes, dhe mos te ekspozohen në diell.