“Trepça” largon nga puna edhe një punëtor tjetër, nuk ishte paraqitur në punë që nga muaji prill

Ndërmarrja publike “Trepça” ka njoftuar se sot ia ka ndërprerë marrëdhënien e punës edhe një punëtori tjetër.

Ky punëtor është me inicialet B.B. dhe sipas njoftimit, i njëjti ka kryer shkelje të rëndë të detyrave të punës.

“Trepça” ka bërë të ditur se i njëjti nuk ishte paraqitur në punë që nga 01 prilli i këtij viti dhe se ishte gjithashtu recidivist i shkeljeve të detyrave të punës.

“Me datën 29.8.2024 Komisioni Disiplinor mbajti shqyrtimin publik lidhur me rastin e z. B.B. bazuar në kërkesën për inicimin e procedurës disiplinore me nr.prot:4651 e dt. 26.8.2024, pas mbajtjes së shqyrtimit publik Komisioni Disiplinor ka vërtetuar se i njëjti ka kryer shkelje të rëndë të detyrave të punës nga neni 10 paragrafi 1 nën paragrafi 1.27 i Rregullores nr.prot: 2906 dt. 30.7.2020 për përgjegjësinë disiplinore dhe materiale të punëtorëve të Trepça Sh.A., për arsye se i njëjti nuk është paraqitur në punë që nga data 01.4.2024 si dhe po ashtu i njëjti ka qenë recidivist i shkeljeve të detyrave të punës”, thuhet në njoftim.