‘Supermenja’ e politikës në Komunën e Prishtinës, Donjeta Dragusha – dikur shantazhuese e punës së Komunës, tani e përkëdhelura e Kryetarit

Donjeta Dragusha po dyshohet se kundërligjshëm po e mban pozitën e drejtoreshës në Komunën e Prishtinës, derisa është pranuar në ndërmarrjes Termokosi

Herë si asambliste dhe herë si drejtoreshë, herë del hapur kundër partisë që e përfaqëson, e herë del e përkëdhelura e kryetarit të Komunës së Prishtinës. Kjo është drejtoresha Donjeta Dragusha, që po del të jetë supermenja e Komunës së Prishtinës. Ajo ka konflikt interesi, pasi mban disa pozita njëkohësisht. Pos si asambliste më herët e pastaj si drejtoreshë, ajo tani ia ka mësyrë edhe Ndërmarrjes Termokosi.

Se zhurma dhe shantazhi vazhdojnë të mbeten mjeti më i fortë politik në shtete si Kosova, kjo po del më se e vërtetë në rastin e Donjeta Dragushës, drejtoreshë e Zhvillimit Rural në Komunën e Prishtinës. Fillimisht si asambliste e LDK-së nga Dega e Parë e Prishtinës, ajo kishte filluar të bënte zhurmë e në Asamblenë Komunale të Prishtinës, atëkohë për një konkurs në Ndërmarrjen ‘Prishtina Parking’. Aty ia kishte vënë syrin një pozite të lartë menaxheriale në këtë ndërmarrje.

Burimet e Gazetës Alo brenda Komunës së Prishtinës, thonë se Dragusha çdoherë e ka përdorur votën e saj në Asamble për interesat e saj personale dhe interesat e grupit të saj. ‘Pasi nuk pati sukses me Prishtina Parking, filloi që të mos merrte pjesë në grupin e asamblistëve të LDK-së, si dhe në mbledhjet e asamblesë kur kishte pika të rëndësishme për Kryeqytetin’, thotë ky burim. Madje, Dragusha atëkohë i bashkohet grupit të të pakënaqurve në krye me Fehmi Kupinën, në momentin kur ky i fundit kaloi me taborin opozitar në Kryeqytet, duke ndikuar që të humb shumica e atëhershme parlamentare në Kuvendin Komunal të Prishtinës. Kjo kishte ndikuar që Prishtina të vonohej me buxhet dhe të bllokohen miliona euro investime dhe projekte të rëndësishme për qytetarët e kryeqytetit.

Burime tona bëjnë me dije se Dragusha ishte bashkëpunëtore e Fehmi Kupinës deri në momentin e fundit, derisa iu premtua se do të bëhet kryetare Degës së Parë, post që e mban edhe sot. ‘Gjithashtu, me këtë rast, ajo u rehatua edhe me një post në ekzekutivin e Komunës së Prishtinës ku bëhet drejtoreshë e Zhvillimit Rural në Prishtinë’. Me këto veprime, Dragusha pastaj u largua nga grupi i renegatëve në krye me Kupinën, duke i shtuar ambiciet e saj. Në zgjedhjet qendrore të shkurtit të këtij viti, ajo u bë pjesë e garës për deputetë të Kuvendit të Republikës së Kosovës. Edhe pse nuk arriti të marrë mbështetjen e elektoratit të partisë së saj, pasi e njohin rolin e saj destruktiv në Komunën e Prishtinës, kjo nuk e ndaloi atë në ambiciet e saj karrieriste. Kështu, pasi nuk arriti as të ishte afër me vota, atëherë Dragusha u vu përsëri në aksion. Kësaj radhe në Ndërmarrjen Publike Komunale “Termokos”. Aty i përfundon të gjitha intervistat dhe kalon për pozitën që ka aplikuar. Më 30 qershor, bëhet e ditur se është pranuar në ‘Termokos’, por ajo ende sot e gati një muaj vazhdon të mbajë postin edhe si Drejtoreshë në Komunë, edhe pse është pranuar në ndërmarrjen ‘Termokos’. Nëse njëmend ekziston termi ‘supermene’ në politikë, atëherë ky titull i takon më së miri znj. Donjeta Dragusha, e cila po del tani edhe e përkëdhelura e kryetarit të Komunës së Prishtinës, Përparim Rama.

Burime brenda Komunës thonë se krejt këto veprime znj. Dragusha po i ndërmerr në prag të zgjedhjeve lokale që priten të mbahen në vjeshtë dhe ‘dëshiron të mos mbetet pa karrige të butë’, pa u merakosur shumë për fatin e partisë që përfaqëson.

Gazeta Alo ka dërguar pyetje me shkrim në Komunën e Prishtinës si dhe në Termokos, por deri në publikimin e këtij artikulli asnjëri institucion nuk ka kthyer përgjigje./Gazeta Alo/