Ambasada amerikane në Prishtinë shpërndan gjetje të CDC-së, vaksinat kundër COVID-19 nuk e ndryshojnë ADN-në e njerëzve

Në drejtim të promovimit të vaksinimit kundër COVID-19, Ambasada e SHBA-së në Kosovë, ka publikuar disa të gjetura të Qendrës për Kontrollin dhe Parandalimin e Sëmundjeve.

Në postimin e Ambasadës Amerikane thuhet se vaksinat kundër COVID-19 nuk e ndryshojnë ose ndërveprojnë me ADN-në tuaj në asnjë mënyrë, përcjell Telegrafi.

“Të dyja, mRNA dhe vektorët viralë te vaksinat kundër COVID-19 japin ‘udhëzime’ (material gjenetik) për qelizat tona për të filluar ndërtimin e mbrojtjes kundër virusit që shkakton COVID-19. Sidoqoftë, materiali nuk hyn kurrë në bërthamën e qelizës, e cila është vendi ku ruhet ADN -ja jonë”, është shkruar në një postim.

Ambasada Amerikane ka shpërndarë gjithashtu dy linqe që dërgojnë tek të dhënat e Qendrës për Kontrollin dhe Parandalimin e Sëmundjeve në SHBA.

Aty jepen të dhëna rreth asaj se si funksionojnë vaksinat në trupin e njerëzve.

Ndryshe, në Kosovë javët e fundit ka pasur rritje të rasteve me coronvirus, ku të martën u konfirmuan 1 mijë e 765 raste.

Për shkak të rritjes së rasteve, Ministria e Shëndetësisë ka propozuar masa të reja kundër COVID-19, të cilat dalin për miratim në mbledhjen që pritet ta mbajë Qeveria sot.

Po ashtu, Ministria e Shëndetësisë dhe Instituti Kombëtar i Shëndetit Publik në vazhdimësi po u bëjnë thirrje qytetarëve që të vaksinohen, në kohën kur virusi Delta po përhapet me shpejtësi të madhe.