Çelaj: Nëse Uran Ismaili do të ishte kandidat i LVV-së, do ta fitonte Prishtinën

Anëtari i Kryesisë së Partisë Demokratike të Kosovës, Lirak Çelaj, ka thënë se Lëvizja Vetëvendosje i ka gjasat shumë të mëdha ta fitojë garën për Prishtinën.

Çelaj në “Debat Plus” ka thënë se qytetari ende nuk është në atë nivel që të vlerësojë profilet e kandidatëve, por bazohen vetëm në parti.

“Qytetarët nuk po votojnë në bazë të programeve”, tha ai, përcjell Telegrafi.

“Aktualisht LVV është në pozicion sikurse që ishte LDK pas luftës, kur çdo kandidat që nxirrte fitonte Prishtinën”.

Ish-kandidati i PDK-së për kryetarë të Prishtinës ka thënë se profesionalisht kandidatura e LDK-së është në nivel shumë të lartë, por sipas tij është problem që ai të fitojë garën për shkak të kohës së shkurtër.

Anëtari i Kryesisë së Partisë Demokratike të Kosovës thotë se në zgjedhje lokale çon shumë peshë partia.

Ai ka vlerësuar Uran Ismailit, por i jep pak shansa PDK-së në Prishtinë.

“Shembull, nëse Uran Ismaili do të kandidonte si kandidat i VV-së, unë mund t’i thosha që do të ishte fitues. Pra është shumë me rëndësi cili kandidat, cilit subjekt i takon, pastaj kandidati i jep nuancën rezultatit përfundimtarë”, tha ndër të tjera Lirak Çelaj.