Dervish Milici, tmerri i shqiptarëve gjatë luftës – Çka thonë dëshmitarët dhe pse u lirua nga Gjykata?

Gjatë luftës njihej si tmerri i banorëve të Klinës e fshatrave përreth. Vetëm 20 vite më vonë, për krimet që i tregojnë edhe shumë dëshmitarë, Dervish Krasniqi, i njohur si “Dervish Milici” ra në pranga të policisë. Në burg nuk i ra të qëndronte gjatë, pasi që një vendim i Gjykatës e la të lirë. Kush ishte “milici” që torturoi shqiptarët dhe pse po vazhdon të qëndrojë i lirë?

Derisa po tentonte që të hynte në Kosovë, pasi që në vend po kthehej për një rast të vdekjes në familje, Dervish Krasniqi, i njohur nga kosovarët si “Dervish Milici”, ra në pranga të policisë së vendit.

Dervish Krasniqi nga 2 tetori po mbahej në Burgun e Sigurisë së Lartë, derisa, për të kishte dyshime se ka bërë krime lufte në Kosovë gjatë viteve 1998-99.

Pavarësisht dyshimeve të rënda që rëndonin mbi të, qëndrimi në burg Krasniqit i ka zgjatur pak, e tashmë i njëjti është liruar.

Gjykata Themelore e Prishtinës ka konfirmuar sot në një përgjigje për Gazetën Express se e ka pranuar propozimin e Prokurorisë Speciale për t’ia ndërprerë paraburgimin Krasniqit.

Kërkesa e Prokurorisë Speciale për lirimin e “Dervish milicit” nga Burgu i Sigurisë së Lartë, ka gjetur miratim nga Gjykata Themelore gjatë ditës së djeshme, megjithatë, ky institucion nuk ka treguar arsyet e këtij vendimi.

“Ju njoftojmë se pas propozimit për ndërprerje të paraburgimit nga Prokuroria Speciale e Republikës së Kosovës për të pandehurin D.K, Gjykata Themelore në Prishtinë – Departamenti Special me datë 26.10.2020 ka aprovuar kërkesën e Prokurorisë Speciale për ndërprerjen e paraburgimit për të pandehurin D.K”, thuhet në përgjigjen e Prokurorisë Speciale për Express.

Gazeta Express jo zyrtarisht ka marrë vesh se lirimi i Krasniqit është bërë në mungesë të provave. Për këtë temë, gazeta ka dërguar pyetje edhe në Prokurorinë Speciale që ka bërë propozimin për ndërprerje të paraburgimit, megjithatë, deri në momentin e publikimit të lajmit të njëjtët nuk kanë kthyer përgjigje.

Arrestimi i 71-vjeçarit nga policia e Kosovës i kishte gëzuar para pak javësh banorët e asaj ane, ku Krasniqi dyshohet të ketë kryer krime.

Banorët e Klinës deklaronin pas arrestimit, se Dervish Milici gjatë viteve të 90’ta kishte vepruar nën uniformën e ushtrisë serbe, e me urdhëra të tyre kishte kryer krime të rënda ndaj banorëve shqiptarë.

Madje, tutje, sipas këtyre rrëfimeve, Krasniqi kishte edhe gradë në policinë e asaj kohe.

“Ky ka rrahur shqiptar sa ka mundur. Ka qenë edhe komandant i policisë në Ujmir të Klinës. Njerëzit tregojnë se ai i ka rrahur njerëzit dhe i ka ulur në shporet”, kishte deklaruar një qytetar.

“Në 12 të natës na kanë dhënë bukë me gips, mua dhe vëllait. Unë se kam ngrënë, vëllain e kanë shti me zor, sot është i sëmurë, vuan prej lukthit”, kështu fliste një qytetar tjetër që kishte qenë një nga personat që thonë se i ka torturuar Krasniqi.

Një qytetar tjetër i kësaj ane, madje kishte thënë se vajzën e Krasniqit e kishte pasur nxënëse, e ai vetë ishte maltretuar nga milici i famshëm i asaj kohe.

“Maltretimi dhe rrahja ka ndodhë në stacion, kjo ka qenë urrejtja e parë e kontakti i parë, e kam urrejtje vetëm pse e kam pas nxënëse cikën e tij, ka qenë një nxënëse shembullore, kështu që nuk kam mujt me u ballafaqu me vajzën e tij, me i thanë më rrahu babai yt (Dervishi)”, thotë ai tutje.

Banorët e kësaj pjese të Kosovës, përmendin edhe shifra se sa persona dyshohet t’i ketë maltretuar ai e kë e kishte bashkëpunëtorë të ngushtë.

“Përmi 1000 shpirta janë torturuar në këtë lokacion nga Hajdar Pashiqi, e me të cilin ka qenë Dervish Krasniqi gjithmonë. Kur e ke pa Hajdarin e ke parë Dervishin.

Dëshmitari tjetër thoshte se muaj pasi kishte përfunduar lufta, Krasniqi kishte qëndruar i mbyllur.

“Ky pesë gjashtë muaj pas përfundimit të luftës ka qenë i mbyllur. Më pas filloi të lirohej dhe doli nga shtëpia”, kishte thënë ai.

Dervisht Krasniqi ishte arrestuar nga policia në pikën e kalimit kufitar në Han të Elezit, me dyshimin e bazuar se ka bërë krime lufte në Kosovën e viteve 1998-1999.