Fjalë Kyçe

“Doli nga vetura dhe shtiu me armë…”, Fero po kërkohet nga policia

“Doli nga vetura dhe shtiu me armë…”, Fero po kërkohet nga policia

Reperi i njohur si Fero po kërkohet nga Policia e Kosovës.

Artisti emri i vërtetë i të cilit është Feronit Shabani dyshohet se të mërkurën ka shtënë me armë zjgarri në një nga lagjet e Gjilanit.

Këtë e ka konfirmuar për Gazetën Online Reporteri, zëdhënësi i policisë për rajonin e Gjilanit, Ismet Hashani, e i njëjti ka thënë se ai ka dalë nga vetura dhe ka shtënë një herë me armë e më pas është larguar nga vendi i ngjarjes.

“Drejtoria Rajonale e Policisë Gjilan, Stacion Policor Gjilan me datën 28.12.2022 në orët e mbrëmjes ka pranuar në informacion se i dyshuari (1994) shtetas i Kosovës me veturën e tij ka shkuar në një lagje të qytetit të Gjilanit dhe po sa ka dalë nga vetura ka shtënë një herë me armë zjarri dhe më pas është larguar nga vendi i ngjarjes”, tha Hashani.

Tutje Hashani thotë lëndime nuk ka pësuar askush.

“Nga kjo e shtënë nuk ka pësuar lëndime trupore askush. Në vendin e ngjarjes kanë dalë njësitet relevante të policisë të cilat kanë bërë ekzaminimin e vendit të ngjarjes. I dyshuari ende nuk është takuar dhe është në kërkim nga ana e Policisë së Kosovës. Në lidhje me rastin është njoftuar Prokurori i Shtetit i cili ka urdhëruar që të iniciohet rast për veprën penale, “Shkaktim i rrezikut të përgjithshëm” ndërsa rrethanat se si ka ndodhur rasti janë duke u hetuar nga ana e Njësisë së Hetimeve të Stacionit Policor Gjilan”, shtoi ai.