Drejtori i Spitalit në Vushtrri nuk i bindet vendimit për shkarkimin e tij

Ka disa ditë që SHSKUK-ja ka shkarkuar nga pozita e ushtruesit të detyrës së drejtorit të Spitalit të Vushtrrisë, Hajrullah Saraçin, i cili ishte drejtor i këtij spitali që nga viti 2015.

Në vendimin e nënshkruar nga drejtori i SHSKUK-së, Basri Sejdiu, thuhet se Saraçi shkarkohet për shkak se ai nuk ka arritur të realizojë objektivat në përputhje me reformat në sistemin shëndetësor, raporton KTV.

Më tutje, në këtë vendim thuhet se pavarësisht mbështetjes që i është dhënë këtij spitali nga SHSKUK-ja, performanca pozitive nuk është arritur.

Por, drejtori tashmë i shkarkuar thotë se ai vazhdon të mos i dijë saktë arsyet e këtij shkarkimi derisa thotë se nuk ka asnjë aferë korruptive apo keqpërdorim gjatë mandatit të tij.

Saraçi më tutje thotë se vetëm disa ditë para se të shkarkohej zyrtarisht, kishte pranuar një telefonatë nga drejtori i SHSKUK-së, Basri Sejdiu, i cili i kishte kërkuar atij që të dorëhiqej.

Por, SHSKUK-ja nëpërmejt një përgjigjeje me shkrim ka thënë se ajo ka marrë vendim që ta shkarkojë Saraçin për shkak të ankesave të vazhdueshme.

Mirëpo, ky institucion nuk ka dhënë sqarime se për çfarë ankesa bëhet fjalë dhe si ishte bërë vlerësimi i performancës së Saraçit në këtë rast.

ju konfirmon se mandati i drejtorit të Spitalit të Vushtrrisë, ka skaduar dhe ai ka qenë vetëm ushtrues detyre i drejtorit të spitalit. Konkursi për zgjedhjen e drejtorit të këtij spitali, kishte dështuar. Ndërkohë, për shkak të ankesave të vazhdueshme, SHSKUK-ja i ka shkëputur kontratën u.d të drejtorit. Deri në publikim të konkursit publik, është caktuar një ushtrues detyre i drejtorit të spitalit, me qëllim të menaxhimit sa më të mirë të spitalit dhe mbarëvajtjes së punës”, thuhet në përgjigjen nga Shërbimi Spitalor Klinik Universitar i Kosovës.

E derisa spitali i Vushtrrisë ka dy vjet që po funksionin me ushtrues detyre, edhe kësaj radhe drejtori i SHSKUK-së ka marrë vendim që në vend të Saraçit si ushtrues detyre të emërojë njërin nga kirurgët e këtij spitali, Mursel Pllanën.

KTV-ja ka tentuar të marrë një përgjigje edhe nga Pllana, por ai nuk ka pranuar të flasë para kamerës.

Një vit më parë në këtë spital kishte dështuar konkursi për zgjedhjen e drejtorit të ri.

Anulimi i konkursit erdhi pas disa reagimeve dhe raportimeve se persona të afërt me PDK-në, po synonin të merrnin drejtimin e spitalit.

Njëri nga pretendentët ishte edhe ish-drejtori komunal nga radhët e PDK-së, Sami Istrefi, i cili një mandat e udhëhoqi drejtorinë e shërbimeve publike, e një mandat tjetër atë të urbanizmit në Vushtrri.