Fjalë Kyçe

Gazmend Agusholli, kandidat për kryetar të Pejës nga Lëvizja Vetëvendosje

Gazmend Agusholli, kandidat për kryetar të Pejës nga Lëvizja Vetëvendosje

Gazmend Agusholli i nominuar nga Qendra e Lëvizjes ‘Vetëvendosje’ në Pejë, si kandidat për kryetar të kësaj komune në zgjedhjet lokale që pritet të mbahen në tetor të këtij viti, tani po e pret edhe miratimin formal nga Këshilli i Qendrës i Lëvizjes ‘Vetëvendosje’.

Më 9 maj, Lëvizja ‘Vetëvendosje’ në Pejë, nxori kandidaturën e Gazmend Agushollit për kryetar të komunës së Pejës nga ky subjekt.

Agusholli ende nuk ka filluar fushatë publike për garën, mirëpo duket se fokusi i tij i këtyre ditëve janë takimet me qytetarët e Pejës.

Në një deklarim për ‘RADIO 1’ sot Gazmend Agusholli pohon se emri i tij ka shkuar tek Këshilli i Qendrës dhe se aty do vendoset për miratim, procedurë kjo logjike dhe derivat i statutit të VV-së.

“Kandidatura ime vendoset në Këshillin e Qendrës. Është kjo një procedurë, një filtër normal që vlen për të gjitha komunat, respektivisht kandidaturat për komuna.”-tha Agusholli për ‘RADIO 1’.

Sa i përket kandidaturës së Gazmend Agushollit, Berat Ganiqi – zyrtar i lartë i VV-së në Pejë dhe këshilltar politik i Ministrit Liburn Aliu, thotë për ‘RADIO 1’, se emrin i Gazmend Agushollit ka marrë mbështetjen dhe dritën jeshile nga kryesia e degës së Pejës.

“Gazmend Agusholli është kandidati i propozuar nga Kryesia dhe tani ka mbetur të vendoset vetëm edhe ne Këshillin e Qendrës duke respektuar normat statutore. Ne jemi dakorduar për të dhe me kompetencë ju them se disponimi i shumicës është shumë pozitiv dhe shumë i mirë në të gjitha nivelet sikur edhe tek qytetarët, për Gaz Agushollin”, thotë Ganiqi.

Gazmend Agusholli është mjek stomatolog me profesion. Rrjedhë nga një familje e respektuar e Pejës. Ka qenë ushtar i UÇK-së. Ka qenë prej themeluesve dhe kryetar i partisë ORA në Pejë. Në një mandat ka qenë edhe nënkryetar i Komunës së Pejës.