Gjakovë: Dhunoi një femër dhe e incizoi aktin e dhunës, ky është vendimi i gjykatës

Të enjten që lamë pas, një femër është dhunuar seksualisht.

Të enjten e kaluar, një femër është dhunuar seksualisht nga një mashkull në Shkugëz të Gjakovës.

Sipas Gjykatës Themelore, i pandehuri me inicialet L. H., gjatë dhunës seksuale ka incizuar aktin dhe e ka kërcënuar viktimën me inicialet H.M., se nëse e lajmëron policinë do ta publikojë videon.

Pas mbledhje së provave, Gjykata Themelore në Gjakovë ka caktuar një muaj paraburgim ndaj të pandehurit L.H., shkruan lajmi.net.

“Me datë 18 korrik 2019, në orët e hershme të mëngjesit, në Shkugëz të Gjakovës, i dyshuari L. H. e detyron të dëmtuarën H. M. që të kryej aktin seksual me dhunë dhe pa dëshirën e saj, dhe të njëjtën e incizon gjatë aktit, duke e kërcënuar se në qoftë se e paraqet rastin në Polici, do ta publikonte videon”, thuhet në komunikatën e Gjykatës.

I pandehuri do të mbahet në paraburgim në kohëzgjatje prej një muaj, i cili do të llogaritet nga data 18 korrik 2019 dhe do të zgjasë deri më 17 gusht 2019.

Sipas njoftimit, gjyqtari i procedurës paraprake në Departamentin e Krimeve të Rënda, pas shqyrtimit të shkresave të lëndës, ka konsideruar se janë përmbushur kushtet ligjore për caktimin e masës së paraburgimit ndaj të pandehurit, pasi caktimi i masave tjera alternative do të ishin të pamjaftueshme për zhvillimin me sukses të procedurës penale.