Humbje që dhemb, Lushtaku kritika në referim

Humbje që dhemb, Lushtaku kritika në referim
March 1, 2019

Drenica ishte afër të kthehej me një pikë nga Gjilani. Megjithatë, në kohën shtesë pranoi dy gola nga Drita dhe u desh të kthehet duarthatë.

Trajneri i ekipit skenderajas, Tahir Lushtaku ka theksuar se kjo ishte një humbje e dhimbshme.

“Është e dhimbshme sepse ndeshjen e humbëm në minutat shtesë dhe nga ajo çfarë treguan futbollistët në fushë nuk ishte e drejtë. Më duhet të pranoj se kundërshtari kishte më shumë sa i përket posedimit të topit, por që nuk na rrezikoj shumë. Në duhej të ishim më të rrezikshëm në fazën e sulmit për ta vënë ekipin kundërshtarë në vështirësi”, theksoi Lushtaku për SuperSport.

Ai u ndal pak edhe te referimi.

“Gjithashtu më duhet të theksoj edhe ndryshimin e kriterit të referimit nga pjesa e parë në pjesën e dytë. Ndoshta edhe pa tendencë, por është parë shumë mirë se gjyqtari kryesor favorizoi ekipin vendase në disa situata të caktuara të lojës. Rezultati i ndeshjes nuk është si faktor i arbitrimit, por që ka ndikuar mjaft shumë në këtë ndeshje, sidomos në pjesën e dytë. Komisioni për delegimin e gjyqtarëve duhet të ketë më tepër kujdes, pasi ky është referi i njejtë edhe në Suharekë ndaj Ballkanit që ka patur të njëjta sjellje”, përfundoi Tahir Lushtaku.

Drenica vazhdon të mos ndjejë stabilitet në renditje.