Kapen 45.5 kilogramë heroinë në Portin e Durrësit

Lënda narkotike që u kap mbrëmjen e të hënës në një kamion në portin e Durrësit është e llojit heroinë. Policia ka sekuestruar 45 kilogramë e 500 gram heroinë.

Në pranga kanë rënë dy persona, pronari i mjetit dhe drejtuesi.

“Si rezultat i kontrolleve intensive dhe informacioneve të marra në rrugë operative nga strukturat hetimore për një sasi lëndë narkotike që do trafikohej drejt Italisë, është organizuar dhe finalizuar operacioni policor i koduar ‘Portëz’, i zhvilluar nga Task Forca permanente që vepron në Portin e Durrësit. Në kuadër të operacionit u bë arrestimi në flagrancë i shtetasve: O. D., 36 vjeç, banues në Fier dhe A. Ç., 45 vjeç, banues në Durrës”, njofton policia.

Kamioni ku u gjet droga e ndarë në 43 pako kishte ngarkesë kromi me destinacion Italinë.

“Task Forca permanente që operon në Portin e Durrësit, bazuar në informacionet e grumbulluara, ka ushtruar kontroll të imtësishëm në kamionët në hyrje dhe në dalje. Gjatë kontrollit në dalje në vijën e dytë, në kamionin tip “Scania” në pronësi të shtetasit A. Ç., që drejtohej nga shtetasi O. D. dhe i ngarkuar me krom, me destinacion shtetin italian, me konkretisht në kabinën e kamionit, u gjetën të fshehura 43 pako të mbështjella me natriban brenda të cilave kishte lëndë narkotike të dyshuar heroinë, me peshë totale 45 kilogramë e 500 gramë”, sqaron policia.

Materialet hetimore i kaluan Prokurorisë Pranë Gjykatës së Shkallës së Parë Durrës, për veprën penale “Trafikimi i narkotike”, kryer në bashkëpunim.