Komunat sërish i kërkojnë Qeverisë që t’iu barten të hyrat vetjake

Kryetari Asociacionit të Komunave të Kosovë (AKK), njëherësh kryetar i Ferizajt, Agim Aliu, i ka kërkuar kryeministrit Albin Kurti që të hyrat vetjake dhe fondet e pashpenzuara t’iu barten komunave, pasi sipas tij, kjo është në përputhje me ligjet.

Aliu të hënën në takimin me kryeministrin Kurti, deklaroi se projektet e komunës i kanë paraqitur si bartje buxhetore, derisa përmendi edhe mungesën e pronave komunale si sfidë të institucioneve lokale.

“Shprehim falënderimin për përgjigjen tuaj pozitive për ftesën tonë për takim. Komunat përmes Asociacionit të Komunave të Kosovës (AKK) vazhdueshëm i kanë paraqitur shqetësimet e tyre në formë zyrtare. Nisur që nga çështja e tatimit në pronë, e falja e 100 eurove, komunat janë gjendur në një situatë të pakëndshme para qytetarëve. Kryetarët e komunave të Kosovës kundërshtojnë bartjen e faljes së tatimit në pronë te komunat”, shtoi ai.

Ai shtoi se janë të shumta kërkesat që komunat ua kanë shtruar Qeverisë.

Kurti po mban takim koordinues me kryetarët e komunave. Nga kryetarët e komunave veriore, prezent është vetëm Erden Atiq, kryetar i zgjedhur në Mitrovicën e Veriut nga Lëvizja Vetëvendosje.