Konjufca bën homazhe në Nakaradë të Fushë Kosovës: Lavdi martirëve të familjes Mirena

Kryeparlamentari, Glauk Konjufca ka bërë të ditur se ka bërë homazhe në Nakaradë të Fushë Kosovës.

Ai përmes një postimi në Facebook tha se gjithmonë do ta kujtohet sakrifica e atdhedashurisë, siç shkroi ai, falë të cilës e gëzojmë lirinë dhe shtetin tonë.

“Të vrarët ishin kudo nëpër Kosovë, të gjithë nën tre emërues të përbashkët: ata ishin shqiptarë, të gjithë të pafajshëm, të gjithë të paarmatosur.Ishin shumë familje që mbetën pa më të dashurit e tyre. Ndër ta edhe familja Mirena në Nakaradë të Fushë Kosovës, ku forcat kriminale serbe ekzekutuan 16 anëtarë të tyre”.

“Sot bëra homazhe për ta nderuar veprën e tyre të sakrificës sublime, për jetët e dhëna në emër të idealit të lirisë. Gjithmonë do ta kujtojmë sakrificën e atdhedashurisë falë të cilës e gëzojmë lirinë dhe shtetin tonë, me vendosmërinë e pakompromis për vendosjen e drejtësisë së plotë që ende mungon”.

“Lavdi martirëve të familjes Mirena në Nakaradë të Fushë Kosovës dhe gjakut të të gjithë të rënëve që rrjedh në venat e lirisë sonë dhe të Republikës së Kosovës”, ka shkruar Konjufca.