Kongresisti amerikan, Eliot Engel do të takohet sot në Prishtinë me kryeministrin Haradinaj.
Takimi mes tij dhe shefit të ekzekutivit kosovar është paralajmëruar për në ora 09:00 të mëngjesit.
Ndryshe, Engel mbërriti në Kosovë më 4 korrik ku mori pjesë në manifestimet për shënimin e Ditës së Pavarësisë së SHBA-së.
Ndërsa dje, takoi presidentin Hashim Thaçi, ndërsa më vonë mori pjesë edhe në ceremoninë e inaugurimit të rrugës Gjakovë-Tropojë e cila mori emrin e tij.
Ditë më parë Engel ka qëndruar për vizitë edhe në Serbi, ku ka qëndruar edhe në Preshevë, prej ku ka shfaqur qëndrimin e tij kundër idesë së korrigjimit të kufijve.
Kujtojmë se kongresisti Engel është kundërshtar i ashpër i idesë së korrigjimit të kufijve ndërmjet Kosovës dhe Serbisë.