Mjeku kujdestar jep detaje për aksidentin në Ferizaj ku vdiqën 4 persona

Mjeku kujdestar në QKMF-në e Ferizajt, Bajram Ajeti ka dhënë detaje për aksidentin e rëndë ku kanë humbur jetën katër persona.

“Rreth orës 15:30 kemi marrë informatën se ka ndodhur një aksident i rëndë. Me të arritur në vendngjarje kemi parë që janë aksidentuar dy vetura. Në veturën e tipit Golf 2 kanë qenë pesë persona dhe në veturën tjetër të tipit Audi kanë qenë 2 persona. Në vendin e ngjarjes kemi marrë një person me lëndime të rënda dhe kemi konstatuar vdekjen e katër personave tjerë. Që të gjithë kanë qenë në veturën e tipit Golf 2. Personat në tipin Audi kanë marrë lëndime pak më të lehta dhe iu është dhënë ndihma në QKMF-në e Ferizajt e më pas janë liruar në shtëpi”, tha Ajeti në RTV Dukagjini.

“Ndër katër personat që kanë humbur jetën kanë qenë një mashkull rreth moshës 40 vjeçare, një fëmijë rreth moshës 12 vjeçare, dhe dy femra njëra e moshës rreth 60 vjeçare dhe një tjetër rreth moshës 30 vjeçare. Personi i pestë që është transportuar në QKUK ka qenë rreth 20 vjeçar dhe ka pasur fraktura të shumta dhe po ashtu lëndime të shumta që janë rikuperuar në QKMF dhe është dërguar në gjendje stabile në QKUK – Prishtinë”, deklaroi ndër të tjera mjeku kujdestar Ajeti.

Një person është ndaluar sot për 48 orë nën dyshimet se ka kryer veprën penale rrezikimi i trafikut publik, ka bërë të ditur Prokuroria Themelore në Ferizaj, Departamenti i Përgjithshëm.

“Lidhur me rastin në fjalë, në vendin e ngjarjes kanë dal të gjitha Njësitet e Policisë, ekipet e mjekësisë ligjore, eksperti i komunikacionit dhe Prokurori i Shtetit, ku, me urdhër të tij, është ndaluar një person i dyshuar në kohëzgjatje prej 48-orësh, për shkak të dyshimit të veprës penale “Rrezikimi i trafikut publik” nga neni 370 të Kodit Penal të Republikës së Kosovës (KPRK)”, ka njoftuar prokuroria.