Fjalë Kyçe

Molliqaj, kritikon Kurtit: Komentoi për Rugovën vetëm për pushtet

Molliqaj, kritikon Kurtit: Komentoi për Rugovën vetëm për pushtet

Kryetari i Partisë Socialdemokrate, Dardan Molliqaj, ka kritikuar ish-kryetarin e tij, kreun e Lëvizjes Vetëvendosje, njëherësh të nominuarin për kryeministër, Albin Kurti, për heshtje ndaj marrëveshjes për linjën ajrore Prishtinë-Beograd si dhe për komentin që e bëri gjatë ditës së sotme me rastin e 14 vjetorit të vdekjes së presidentit historik të Kosovës, Ibrahim Rugova.

Molliqaj, në një postim në Facebook, ka kritikuar edhe qeverinë në largim dhe partitë tjera parlamentare që e lavdëruan këtë marrëveshje, sepse, siç tha ai, me këtë marrëveshje, Serbia arriti që çdo qarkullim ajror që bëhet nga dhe drejt Prishtinës e që duhet të kalojë kah hapësira ajrore e Serbisë, të monopolizohet vetëm nga një kompani – që në anën tjetër mund të shërbejë edhe si ndërmjetësuese potencialisht për kompani ajrore të Serbisë, raporton Koha.net.

Ai thotë se kjo marrëveshje u nënshkrua duke u bazuar në Rezolutën 1244 dhe aty Kosova nuk u përfaqësua as si palë, por vetëm si një agjension.

“Është i papranueshëm lavdërimi i kësaj marrëveshjeje nga pushteti në shkuarje dhe partitë e tjera parlamentare. Është po aq i papranueshëm mos-reagimi i të nominuarit për Kryeministër, që u votua nga qytetarët bash duke premtuar reciprocitet e barazi në raportet e Kosovës me Serbinë”, tha Molliqaj.

Kreu i PSD-së tha se Kurti komentoi për vdekjen e Rugovës për herë të parë pas 14 vjetësh, dhe thotë se këtë e bëri “vetëm dhe vetëm sepse po i duhet për pushtet”.

“Sot, për herë të parë pas 14 viteve, gjeti vullnetin dhe kohën për të komentuar për Rugovën, vetëm dhe vetëm sepse po i duhet për pushtet. Dhe sot, për herë të parë pas 15 vitesh, nuk e kundërshtoi një marrëveshje shumë të dëmshme me Serbinë, vetëm dhe vetëm nga frika që po mbetet pa arritur në pushtet”, deklaroi ish-deputeti i VV-së.

Ai tha se “ky është një paralajmërim i qartë që edhe nën qeverinë e tij, Kosova do të dëmtohet shumë në raport me negociatat me Serbinë”.