Mysafiri i infektuar e bën dasmën me mbi 200 veta, vatër të koronës

Në Schwellbrunn, Kantoni Appenzel Ausserrhoden, përqindja e njerëzve të infektuar me koronavirus në raport me popullsinë është veçanërisht e lartë. Statistikisht, mbi 1000 raste infeksioni për 100,000 banorë janë regjistruar në këtë komunë që ka afër 1600 banorë, shkruan tagblatt.ch.

Siç ka deklaruar drejtori shëndetësor i kantonit të Appenzell Ausserrhoden, Yves Noël Balmer në një konferencë për media, të paktën njëra nga arsyet për këtë shpërthim është sjellja e keqe e njerëzve në një dasmë, transmeton albinfo.ch.

“Në Schwellbrunn është bërë një dasmë me mbi 200 të ftuar. Njëri ndër mysafirët e pranishëm, ka qenë me test pozitiv për koronavirus. Masat e mbajtjes së distancës dhe ato higjienike nuk janë respektuar. Edhe pse nusja dhe dhëndri dinin për testin pozitiv të të ftuarot, ata nuk na kanë kontaktuar”.

Shumë njerëz kanë ditur për incidentin rreth dasmës, por nuk e kanë raportuar atë në kanton, përcjell albinfo.ch. Vetëm rastësisht është marrë vesh për këtë rrethanë, dy javë pas dasmës, ka thënë Balmer.

Gjatë dasmës, të ftuarit ishin dakorduar të mos testoheshin për të shmangur një karantinë të mundshme. “Një sjellje e tillë më inatos dhe tmerron”, thotë drejtori i shëndetësisë, transmeton albinfo.ch. Tani duhet të kontrollohen degëzimet ndividuale të virusit.

Disa nga të ftuarit më vonë kanë marrë pjesë në një “Oktoberfest” dhe aktivitete të tjera.