Ndërtesa e Qeverisë ndriçohet me simbolin e kordelës, për eliminimin e dhunës ndaj gruas

Me rastin e shënimit të 25 Nëntorit Ditës Ndërkombëtare për Eliminimin e Dhunës ndaj Gruas, Agjencia për Barazi Gjinore, ka vazhduar fushatën e 16 Ditëve të Aktivizmit me ndriçimi e Ndërtesës së Qeverisë – Zyrës së Kryeministrit me simbolin e kordeles së bardhë dhe ngjyrën portokalli.

Siç thuhet në njoftim, fushata e 16 Ditëve të Aktivizmit është fushatë botërore që organizohet çdo vit.

“Fushata fillon me 25 Nëntor, është e njohur si Dita Ndërkombëtare për Eliminimin e Dhunës ndaj Gruas dhe përfundon me 10 dhjetor, Ditën e të Drejtave të Njeriut. Çdo vit përmes fushatës bëhen thirrje për veprime globale për të rritur ndërgjegjësimin në mbarë botën për parandalimin dhe eliminimin e dhunës ndaj grave e vajzave. Simboli i fushatës është kordelja e bardhë, ndërsa ngjyra zyrtare e fushatës është portokallia qe simbolizon një të ardhme të ndritshme dhe një botë të lirë pa dhunë ndaj grave”, thuhet në njoftim.

Ndërtesa e Qeverisë do të qëndroj e ndriçuar prej orës 17:00 deri në orën 24:00. Kjo iniciativë është përkrahur nga fondet financiare të SIDA Suedeze.