Në “luftë” me ish gruan, Johnny Depp dëshmon në gjykatë: Nuk kam goditur asnjë grua në jetën time

Aktori Johnny Depp mori pjesë të martën në gjyqin për shpifje kundër ish gruas së tij, Amber Heard, duke thënë se akuzat për abuzim në familje ishin të neveritshme dhe të pabazuara. “Asgjë e tillë nuk ka ndodhur kurrë,” tha Depp në gjykatë.

“Nuk kam arritur kurrë në pikën që të godas Heard në asnjë mënyrë. As nuk kam goditur ndonjëherë ndonjë grua në jetën time. Kanë kaluar gjashtë vjet të vështira. Është shumë e çuditshme kur një ditë je Hirushja, si të thuash dhe pastaj në 0,6 sekonda jeni Kuazimodo.”

“Jam i fiksuar pas së vërtetës”, tha Depp. “Pra sot është mundësia ime e parë që kam qenë në gjendje të flas për këtë rast.” Për sa i përket Heard, Depp tha se ajo dukej “shumë e mirë për të qenë e vërtetë” në fillim të marrëdhënies së tyre.

“Ajo ishte e vëmendshme,” tha Depp për gruan me të cilën u martua në 2015. “Ajo ishte e dashur. Ajo ishte e zgjuar. Ajo ishte e sjellshme. Ajo ishte qesharake. Kishim shumë gjëra të përbashkëta”, tha aktori duke shtuar se brenda një viti e gjysmë ajo u bë një person tjetër.

Deri më tani, miqtë, familja dhe punonjësit e Depp kanë dëshmuar se Heard ishte agresorja në lidhje, duke e sulmuar atë fizikisht në disa raste. Ish-asistentja personale e Heard-it dëshmoi se ajo e kishte pështyrë aktorin në fytyrë nga inati.

Ndërkohë, gjykatësit kanë parë mesazhe me tekst në të cilat Depp përdor gjuhë vulgare për Heard dhe shpreh dëshirën për t’u hakmarrë kundër saj, transmeton abcnews. Avokatët e Heard kanë thënë se ai e ka sulmuar atë fizikisht dhe seksualisht në shumë raste, shpesh në situata ku pinte aq shumë sa e nxirrte jashtë.

Aktori ka paditur ish gruan për miliona dollarë për shpifje për një artikull që ajo shkroi në The Washington Post në vitin 2018 ku fliste për dhunën në familje. Në artikull, Heard e quajti veten një “figurë publike që përfaqëson abuzimin në familje”.