Nga 400 mijë në 630 mijë euro rritet tenderi për asfaltim të një rruge në Suharekë

Skandalet me tenderë nuk kanë të ndalur në Suharekë, kjo pasi që komuna e ka anuluar një tender me shumë më të ulët dhe i ka dhënë një kompanie tjetër, që ka ofruar çmim shumëfish më të lartë.

Suhareka ditë më parë u bë hit në internet lidhur me rrethin e ndërtuar mbi zemra në një shkollë. Shumë qytetarë u tallen me këtë rreth duke e quajtur edhe si urë lidhëse me Malishevën.

E në Suharekë nuk kanë të ndalur çuditë, kështu edhe të paktën ka thënë Partia Demokratike e Kosovës (PDK) dega në këtë qytet.

Kjo parti ka reaguar ndaj një skandali të radhës lidhur me një tender, rreth asfaltimit të një rruge.

Për asfaltimin e rrugës që lidhë fshatin Ngucat (Rruga Bashkim Gashi, Lagjia Zekolli), Suharekë, komuna fillimisht ka shpallur fitues një operator me arsyetimin e çmimit më të lirë të ofruar në tender, ku vlera ishte 479256,94 euro.  Mirëpo pastaj dhe një operator tjetër shpallet fitues i tenderit me arsyetimin e njëjtë, pra ofertuesi më i lirë, por realisht çmimi i ofruar nga shpallja e dytë e fituesit nuk është më i lirë sesa çmimi i fituesit në herën e parë.

Përkundrazi, është rreth 150 000 euro më i shtrenjte, ose saktësisht vlera e tij është 628713,80 euro.

PDK ka thënë se dikush duhet të mbajë përgjegjësi pasi që nuk po zbatohet ligji dhe nuk po respektohen procedurat e kriteret për këto tenderë.

Në Suharekë skandal ka pasur edhe me tenderin e sheshit të qytetit, derisa Bali Muharremaj i ka dhënë tender bashkpartiakut të tij, Blerim Kuçi. Ky tender kap vlerën prej 1.7 milionë euro.