Fjalë Kyçe

Një student në Prishtinë sulmohet nga qentë me pronarë, kërkohen masa ndaj mbajtësve të tyre

Një student në Prishtinë sulmohet nga qentë me pronarë, kërkohen masa ndaj mbajtësve të tyre

Numri i madh i qenve endacakë që shëtisin lirshëm rrugëve të Prishtinës, është problem i vazhdueshëm për kryeqytetin.

Mirëpo, shqetësim tjetër së fundmi janë qentë me pronarë, të cilët lëshohen për shëtitje pa masa mbrojtëse, raporton emisioni 038 i KTV-së.

Disa të tillë e kanë sulmuar studentin e Inxhinierisë Elektrike dhe Kompjuterike, Valdrin Januzi, të cilit i kanë shkaktuar lëndime.

Ai tregon për sulmin sa ishte në oborrin e Fakultetit Teknik.

Januzi thotë se pronarët e qenve nuk janë interesuar për gjendjen e tij, pavarësisht që i kishin premtuar një gjë të tillë.

Policia bën të ditur se sipas Ligjit për Kundërvajtje, njërit pronar të qenit i është shqiptuar gjobë për këtë rast. Por, për studentin Januzi, ky ndëshkim është i ulët dhe i papranueshëm.

Ai thotë se do të angazhohet që kjo çështje të rregullohet me ligj të veçantë në mënyrë që përgjegjësit të marrin dënimin e merituar.

Megjithatë, ka një ligj që përcakton përgjegjësinë e pronarit të kafshës.

Neni 163 i Ligjit për Marrëdhëniet e Detyrimeve thotë se zotëruesi i kafshës së rrezikshme, është përgjegjës për dëmin e shkaktuar nga ajo.

Por, aty nuk përcaktohet çfarë dënimi mund të marrë pronari i kafshës që shkakton dëm.

Policia u bën thirrje qytetarëve që të mos i nxjerrin qentë për shëtitje pa masa mbrojtëse.