Policia jep detaje për rrahjen në një qendër tregtare në Prishtinë

Video e një rrahjeje të rëndë është shpërndarë sot në rrjete sociale.

Policia e Kosovës ka dhënë detaje lidhur me rastin e rrahjes që ka ndodhur ditë më parë në një qendër tregtare në Prishtinë.

Zëdhënësi i Policisë së Kosovës për Rajonin e Prishtinës, Agron Borovci ka thënë për Telegrafin se rasti ka ndodhur me 6 maj dhe se rasti tashmë është zbardhur nga Policia e Kosovës.

Ai ka shtuar se ndaj dy të dyshuarve është ngritur kallëzim penal.

“Rastit të cilit po i referoheni ka ndodhur më 06.05.2021 dhe i njëjti është trajtuar nga ana e policisë me ç’ rast janë ndërmarrë të gjitha veprimet e nevojshme hetimore që kanë konsistuar në sqarimin dhe ndriçimin e rrethanave të ngjarjes. Për më shumë, ndaj të dyshuarve pas hetimeve të kryera nga ana e policisë, më datë 08.05.2021 është proceduar kallëzimi penal në prokurorinë themelore të Prishtinës si vijimësi e veprimeve të mëtejme hetimore e procedurale”, ka thënë Borovci.

Më poshtë e gjeni videon ku pretendohet se punëtori i sigurimit ushtron dhunë ndaj një personi.