Partia Socialdemokrate, ka reaguar në lidhje me largimin e 30 punëtorëve nga Aeroporti Ndërkombëtar i Prishtinës, shkruan Gazeta Insajderi.
Në këtë reagim të PSD-së, thuhet se “Limak” nuk po di të ndalet, derisa kanë cituar sindikatën e punëtorëve të cilët kanë thënë se nga janari i këtij viti e deri sot numri i të larguarve arrin në 54.
“Largimet nga puna, edhe në Aeroport sikur në KEDS kanë për qëllim disiplinimin e punëtorëve përmes ndëshkimit. Sindikata tregon se qysh nga greva e gushtit të vitit 2019 kishin nisur kërcënimet e shantazhet. Punëtorët e larguar, përfshirë këtu udhëheqës të Sindikatës po largohen sepse kanë organizuar grevë për të drejtat e tyre. Grevë kjo që është në përputhje me ligjin”, thuhet në reagimin e tyre.
Tutje PSD, kanë thënë se menaxhmenti i kompanisë “Limak”, është shprehur se nuk ka largime nga puna por vetëm mosvazhdime të kontratave.
“Kjo fjali mund të merret e mirëqenë vetëm kur si gjendje normale kemi pranuar prekariatin. Pra, me kontrata afatshkurtëra ose pa to fare, pa të drejta e siguri për të ardhmen. Kjo është gjuha shpjeguese e neoliberalizmit për punëtorin”, vazhdon reagimi.
PSD, kanë thënë se kompania në fjalë ka përfituar e grabitur shumë nga asetet publike të Kosovës përmes procesit të privatizimit. Sipas tyre, këtë e ka bërë përmes qeverive të mëparshme.
“Por, veprimet e fundit në KEDS dhe ANP “Adem Jashari” vijnë në kohën e Qeverisë që thotë se është për punëtorët e mirëqenien e tyre. Qeveria e re nuk na ka treguar ende nëse i qëndron besnike qëllimit të dikurshëm për rishikimin e privatizimit, veçanërisht privatizimit të rrjetit të shpërndarjes dhe shitjes së energjisë ku është kompania në fjalë. PSD qëndron në solidaritet të plotë me punëtorët, mbështet kërkesat e tyre dhe ofron çdo mbështetje e angazhim”, përfundon reagim i Partisë Socialdemokrate.