Rafuna thotë se buxheti për ushtrinë pritet të jetë 13.4 milionë euro

Ushtria e vendit tonë sivjet pritet ta ketë buxhetin e saj 13 milionë e 400 mijë euro, pjesa dërmuese e këtyre mjeteve financiare do të destinohen për blerjen e armëve dhe municionit. Rritje të buxhetit 100 për qind sikur për FSK-në, do të ketë edhe për policinë e Kosovës nga 1.3 milionë në 2. 5 milionë euro.

Kjo rritje e buxhetit për vitin 2020 ka për qëllim forcimin e ushtrisë, policisë dhe sovranitetin e vendit tonë.

Po në këtë vit sikur në vendet e rajonit, pritet që Kosova me Kodin e ri të doganës dhe akcizës të ngritë limitin e lirimeve doganore për mallrat e importuara, nga 20 euro sa është aktualisht në 40 euro.

Ministri në detyrë i Financave, Lulëzim Rafuna në një intervistë për KosovaPress tha se rritja e këtij buxheti është interes publik për vendin dhe për sigurinë e vendit, sipas të cilit, duhet të procedohet tutje dhe të ketë një ujdi mes partive parlamentare për ta votuar buxhetin.

Rafuna thotë se buxheti i vitit 2020 është buxhet më i lartë se i vitit paraprak, 2 miliardë e 467 milionë euro i cili nuk parash ngritjen e ndonjë tatimi ekzistues apo ndonjë tatimi të ri, teksa shtoi se buxheti rritet nga zhvillimi i aktiviteteve ekonomike. Madje, ky projektbuxhet buxhet nëse arrin të votohet në Kuvendin e Kosovës, pas marrëveshjes ndërmjet dy subjekteve politike, LV dhe LDK, nuk do të pësoi ndryshime të mëdha dhe prioritet do ta ketë zhvillimin ekonomik, arsimin, shëndetësinë dhe fushën e drejtësisë.

“Ky buxhet prioritet ka zhvillimin ekonomik të vendit, arsimin shëndetësinë si dhe fushën e sundimit të ligjit… Për Forcën e Sigurisë së Kosovës dhe për policinë e Kosovës buxheti është rritur në 100 për qind, te pjesa e armatimit dhe municionit. Buxheti për ushtrinë ishte 6 milionë e 700 mijë euro, tani 13 milionë e 400 mijë, për policinë e Kosovës ishte 1 milionë e 300 mijë ndërsa tani është 2 milionë e 500 mijë. Qëllimi është që ta forcojmë ushtrinë, policinë dhe ta forcojmë sovranitetin e vendit tonë”, thotë Rafuna.

Ministria e Financave, sipas ministrit në detyrë, ka përgatitur Kodin e ri të doganës dhe akcizës, meqë në Bashkimin Evropian kanë ndryshuar direktivat, por edhe në vendet si Maqedonia Veriore dhe Shqipëria kanë bërë adoptimet e fundit të direktivave të BE-së, ku edhe është ngritë limiti i lirimeve për vlerën e mallrave të importuara.

“Edhe ne e kemi përgatitur draftin, i cili tani gjendet në Ministri të Financave dhe besojmë që me Qeverinë e re, që do të vjen, drafti do të procedohet tutje në Kuvendin e Kosovës për aprovim ku do të jetë e njëjta vlerë, pra në 40 euro, për arsye se do të jetë e harmonizuar me direktivat e BE-së. Kodi i doganës dhe akcizës është ende në Bruksel për komentet e fundit për faktin se ne shkëmbejmë në periudha të rregullta. Me hyrjen në fuqi të Kodit të doganave dhe të akcizës, të riun, do të vijmë deri te kjo vlerë e lirimit sikurse në Maqedoni të Veriut , Shqipëri dhe do të jetë e harmonizuar me vendet e tjera”, deklaron Rafuna.

Ai beson që qeveria e re do ta procedon dhe do të aprovohet në Kuvend të Kosovës që të hynë në fuqi këtë vit, për arsye se është edhe kërkesë që del nga raporti i progresit i Komisionit Evropian për vendin.