Rrahmani shënon gol në fitoren e thellë të Napolit

Amir Rrahmani ishte njëri prej golashënuesve të fitores së thellë të Napolit të mërkurën mbrmëa.

Napoli e mposhti 6:1 skuadrën e Sassuolos në udhëtim, në ndeshjen e mbetur të xhiros së 21-të të elitës italiane të futbollit.

Rrahmani e realizoi golin e dytë të edicionit aktual pas gjuajtjes së saktë nga zona në minutën e 29-të.

Ai i barazoi shifrat në 1:1 pasi fillimisht kishte realizuar Urosh Raçiq për vendësit.

Më pas, sulmuesi nigerian Victor Osimhen, realizoi “hat-trick”.

Osimhen shënoi në minutën e 31-të dhe të 41-të, si dhe dy minuta pas pushimit.

Dy golat e fundit në ndeshje i realizoi Khvicha Kvaratskhelia në minutën e 51-të dhe të 75-të.

Rrahmani luajti deri në minutën e 62-të për Napolin.

Nedim Bajrami u zëvendësua në minutën e 77-të, atëherë kur u inkuadrua Marash Kumbulla nga banka rezervë.

Për Kumbullën ishte debutim me Sassuolon, qëkur u huazua në fillim të muajit shkurt nga Roma.

Napoli në 26 ndeshje ka gurmbulluar 40 pikë, aq sa ka edhe Lazio në vendin e tetë.

Sassuolo po lufton për mbijetesë dhe ka 20 pikë në vendin e 18-të.