Sërish befason moti në Kosovë, ja çfarë temperaturash na presin në ditët e fundit të këtij muaji

Në fundjavë mbetet mot kryesisht me mjegull ose vranësira të ulëta. Në fillim të javës me vranësira, ditën edhe intervale me diell. Temperaturat gradualisht në rritje.

Sipas Prishtina Weather fusha ciklonike ditën e diel depërtojnë mbi Mesdhe nga Afrika veriore, që mund të sjellin kushte për të reshura shiu edhe përgjatë bregdetit shqiptar ditën e hënë. Këto kushte mund edhe të zhbllokojnë këtë situatë meteorologjike mbi vendin tonë, kur gjatë ditës mund të ketë edhe intervale me diell, mirëpo orëve të mëngjesit mbesin kushte për mjegull.

Në pjesën e dytë të javës priten mundësi edhe për të reshura shiu, e sipas disa modeleve mund të priten edhe reshje bore në fundjavën e ardhshme.

Ndotësit ajror do të mbeten të rritur edhe ditëve në vijim, e indeksi i cilësisë së ajrit kalon në vlera të dobëta dhe shumë të dobëta, mirëpo gjatë ditës mund të zbres edhe në vlera mesatare.

19.12 – Nëpër ultësira kryesisht me mjegull ose vranësira të ulëta, me mundësi për intervale me diell gjatë ditës. Në vise kodrinoro-malore kryesisht me diell..

20.12 – Kryesisht me vranësira. Nëpër ultësira kryesisht me mjegull/vranësira të ulëta, e vende-vende mund të mbetet edhe përgjatë ditës..

21.12 – Përgjatë ultësirave në mëngjes kryesisht me vranësira të ulëta ose mjegull. Ditën kryesisht me vransira, e që deri në mbrëmje pritet të shpërndahen.

22.12 – Në mëngjes mjegull ose vranësira të ulëta përgjatë ultësirave. Ditën vranësira dhe intervale me diell.

23.12 – Orëve të mëngjesit përgjatë ultësirave me mundësi për mjegull, ditën pjesërisht vranët, me intervale më të gjata me diell.

Temperaturat minimale të ajrit lëvizin nga -1C deri 2C, e temperaturat maksimale gradualisht do të rriten në 7C deri 10C.

Era fryn lehtë drejtimesh të ndryshme 1-4m/s.

Shtypja atmosferike mbetet e lartë mbi vlera normale, me tendencë të rënies nga java e ardhshme.